Kissamae ug ang gitarista

Gula 6

“Kaganina ka ra ba nga miabot Bran?” matud ni Kissamae nga nagpahiyom.  Matud ni Brando nga dili pa kaayo dugay siya nga miabot. “Nananghid ra ko karon sa akong mga kauban nga dili lang mo-duty sa Casino kay magtudlo ko nimo og guitar,” giingnan ni Brando si Kissamae.

“Ayaw pag-absent sa imong trabaho uy, duty lang gud. Total alas kuwatro pa man sa hapon,” matud sa call center agent. Nanulod sila sa boarding house ni Kissamae. Gitimplahan ni Kissamae og juice drink si Brando og nananghid siya nga maligo kay init kaayo ang panahon.

Wala magdugay si Kissamae sa pagkaligo kay maikog siya nga magpaabot kaniya’g dugay ang higala niya nga gitarista. Paggawas ni Kissamae sa banyo, mitutok pag-ayo si Brando kaniya. Miduko si Kissamae kay nauwaw siya nga gitutokan ni Brando. Nakahukom si Kissamae nga mag-short pants lang siya kay init kaayo ang panahon. Dihang migawas na ang dalaga sa iyang lawak, nakabantay na usab siya nga pilit kaayo’g tinutokan kaniya si Brando.

Ingon sa gibati’g kauwaw si Kissamae nga gitutokan siya’g maayo ni Brando. Nakabantay ang gitarista mao nga giam-aman niya ang dalaga. “Wala’y malisya ang pagtutok ko nimo Kiss ha, nakadayeg lang ko kay misamot ka kaanyag nga nag-short pants.”

Igo lang mipahiyom si Kissamae. Misugod dayon si Brando sa pagkuting-kuting sa gisipitan niya nga siyesta. Gibuksan niya ang chords book nga iyang gidala aron masayod si Kissamae sa porma sa mga tapoy.

Naglisod pagpahimutang si Kissamae sa iyang mga tudlo ngadto sa tratse. Napugos si Brando paggunit sa mga tudlo sa dalaga aron matabangan kini pagpahimutang ngadto sa tratse. Lumoy kaayo ang mga tudlo sa dalaga nga mata’g karon ug unya gunitan ni Brando.

Gisunod ni Brando ang pagtudlo ni Kissamae kun unsaon pagkablit ang mga kwerdas sa siyesta. Niining tungora, mas nagkanindot ang sitwasyon kay gikan sa tudlo karon kamot ni Kissamae na g’yud ang magunitan ni Brando.

Nasimhot usab ni Brando ang kahumot ni Kissamae. Dali ra kaayo natiman-an ni Kissamae ang mga tapoy nga gitudlo kaniya sa higala niya’ng gitarista. “Lipay kaayo si Kissamae nga nakaantigo na siya’g gamay unsaon pagtapoy ang siyesta.

“Unsa’y maayo kun mo-duty ka lang karon Bran kay anugon kaayo nga mo-absent ka. Ubanan tika kun gusto ka,” matud ni Kissamae.

Nakalitan si Brando apan gikalipay niya ang tanyag ni Kissamae. Tuod, nagkuyog sila si Kissamae ug Brando pag-adto sa Casino. Nahibulong ang mga kauban ni Brando nga mitunga siya nga unta nananghid man nga mo-absent.Pagkanta ni Brando, garbo kaayo siya kay gi-greet siya ni Brando ug gipahinungdan og awit. (Sumpayan)