Isla Paraiso

Gula 172
Gipakaingon kadto ni Rey og dumalayon na ang ilang kalipay ni sister Veronica sa dihang gidawat na sa madre ang iyang gugma. Hilabihan ang iyang kahinangop pagkasayod niya nga  nakahukom na si sister Veronica sa pagluwat sa iyang bokasyon ug mogawas sa kombento. Mahinamon kaayo siyang nagpaabot sa adlaw sa paggawas ni sister Veronica sa kombento. Maoy iyang plano nga mamauli dayon sila sa Bohol aron pagpangayo sa mga kamot sa babaye nga iyang gihigugma sa mga ginikanan niini aron iya kining ihatod ngadto sa altar sa kaminyoon. Daghan na kaayo siyang mga plano alang kanilang duha.
Apan sama ka kalit sa kilat, nasuhong ang tanan. Namatay ang iyang mga pangandoy alang kanilang duha ni sister Veronica gumikan sa hinanaling kausaban sa hukom sa madre. Dili na kini mohinayon paggawas sa kombento ug ipadayon na niini ang pag-alagad sa kombento isip usa ka madre. Sa iyang paglakaw nga wala’y tinong padulngan, wala damha nga nahitukmaan ni Rey ang usa ka imnanan. Daklit niyang gitutokan ang karatola sa gawas. Unya misulod siya. Daghan nang kostumer sa sulod. Nagkinantahay na ang ubang kostumer nga nadutlan na sa espiritu sa ilimnong makahubog.
Nangita gilayon og lamesa si Rey. Maayo gani kay may bakante pa. Layolayo kini’g diyotay sa mga kostumer nga nagkinantahay. Nagustohan niya ang maong puwesto. Dili siya gusto nga duol sa videoke kay alingising kaayong pamation ang kanta sa mga kostumer. -- Sumpayan pa