Kissamae ug ang gitarista

Gula 3

Gitagbaw nila ni Fe ug Kissamae ang ilang kaugalingon pagsuroy sa higante’ng mall. Dihang hapit na manirado ang mall, nanulod sila og restaurant. Kalit lang misantop sa huna-huna ni Fe si Brando. “Kun dia pa si Brando uban nato siya na usab unta ang mobayad.”

Wala g’yud magnihit og kwarta ang duha ka mag-amiga kay dagko man sila og sweldo pagka call center agents apan mitumaw lang g’yud ang pagka komedyante ni Fe. Human sila makakaon, nakahukom ang duha nga mosulod sa Casino sa Waterfront Hotel.

Gusto si Fe nga motan-aw kun unsa kini’ng giingon nga slot machines nga gikabuangan sa kauban niya nga mga call center agents diin ang uban kanila nakadaug na. Wala sila magpaila nga karon pa makaadto sa Casino.

Namusta ang mag-amiga apan wala sila giswerte, pilde. Misuroy sila sa unahan ug nadani ang ilang pagtagad sa musical band nga nagkanta sa gamay kaayo nga stage ug daghan ang nanan-aw niini sa atubangan.

“Maayo sila motukar day no?” matud ni Fe human sila makapaminaw sa mga kanta sa grupo. Taud-taud, misugod na usab ang grupo pagkanta. Sa pasakalye pa lang gani nahibaw-an na nila ni Kissamae ug Fe nga Just Tell Me You Love Me ang kantahon sa singer.

“I would like to greet this song to my new friends, Kissamae and Fe,” matud sa singer. Nahingangha kaayo ang duha ka mag-amiga nga gi-greet man sila sa singer. Mipahiyom ang singer kanila sa wala pa misugod pagkanta.

Gitutokan nila ni Fe ug Kissamae ang singer ug diha nila masuta nga si Brando diay ang lead singer ug guitarist pa g’yud sa grupo. Pwerte nga nakapagakpak sa duha ka call center agents tungod kay nakuha gayud ni Brando ang estelo sa original singer nga mikanta.

Sa hilom, misamot ang pagdayeg ni Kissamae kang Brando. Gawas nga maayo kini mo-guitar, maayo pa gayud og tingog nga mokanta. Wala g’yud palandunga nila ni Fe ug Kissamae nga magkakita ra gihapon sila si Brando.

Gipaminaw ug gisabot pag-ayo ni Kissamae ang mata’g pulong sa awit Just Tell Me You Love Me. Makahuloganon kaayo ang mao nga awit. Wala niya palandonga nga kadto maoy nagsilbi nga sinugdanan nga mobati siya’g kaibog sa singer.

Igo lang mikanta og mga napulo ka kanta ang grupo, miundang na sila ug lain na usab nga grupo sa banda ang mipuli. ”Nakasuroy lagi mo dinhi Kiss, Fe?” matud ni Brando. (Sumpayan)