Pahagka ako sa imong aping

Dugay na si Peter nga  nangulitawo kang Anecita apan ingon sa gahi pa gyod ang dalaga nga modawat sa iyang gihalad nga gugma. Ug
nasabtan siyang gipaantos gyod siya pag-ayo niini.

Espoko moy duha ka tuig na kapin ang iyang pag-antos ug paninguha aron maangkon niya ang kasingkasing sa dalaga apan wala gyod bisa’g gamay na lang nga kahayag nga iyang nakita nga mao untay lamdag sa usa ka paglaom ning way kamatayon niyang pagpaninguha sa babaye nga iyang gihigugma. Pulos lang insulto ug kahimalingka ang iyang nadawat gikan niini.

“Wala na ba gyoy bisa’g gamay na lang paglaom nga imo akong higugmaon, Anecita?” gisuna niya si Anecita usa kadto ka mamingaw’ng gabii sa iyang pagpamisita sa dalaga. Mora’g nagmuro lang ang nawong ni Anecita nga wala malipay ning iyang pag-anhi sa ilang balay.

“Wala, busa, ayaw na lang anhi dinhi. Samoksamok ka lang nako, da, katugon na man unta ko. Sige na, lakaw na, kay matulog na ko,” niini pa nga wala motan-aw sa ulitawo.

“Sige, mao man  kahay imong gusto, adto na ko, Anecita,” ni Peter pa nga gibati’g kasakit sa pag-agda ni Anecita kaniya sa pagkanaog na sa ilang balay sa dalaga. Unya may nahunahunaan siya, basin na lang kun mosugot kini, total dili na man gyod siya mobalik pa dinhi sa ilang Anecita. “Mahimo ba nga ... nga pahagkon ko nimo sa imong aping, Anecita?”

“Ha!” mora’g nahauknot ang dalaga sa pagkadungog niya sa gihangyo ni Peter. “Kabastos nimo, uy...”

“Sorry, hangyo lang god ning ako, kana kun mosugot ka,”hinay ang tingog ni Peter. Unya mitindog si Anecita ug mipaingon sa ilang sala ug giserhan ang pultahan-mayor nga pinapundak. Nanaog na lang si Peter nga nagbalon og dakong kahiubos sa pagtratar ni Anecita kaniya og ingon niadto nga batasan. Pero, bisan pa, gihigugma gihapon niya ang dalaga usa ka gugma nga didto ra maglublob sa sulod sa iyang kasingkasing.

Paglabay sa daghang katuigan wala gihapon malimot si Peter sa pagpasakit kaniya ni Anecita. Unya sama sa liti sa udtong tutok nga miigo sa iyang kasingkasing dihang mikaylap ang balita sa tibuok balangay ang balita nga si Anecita patay na. Giurom kuno kini.

Ug didto sa haya ni Anecita, naghilak si Peter nga miduaw ug unya iyang gihagkan ang aping sa gihaya nga babaye nga maoy natingban iyang pagmahal.

“Pasayloa ko sa paghalok ko sa imong aping, kay niini lang higayona nga mabuhat ko kini, kun tua ka na sa laing kalibotan, paabuta ko, kay didto basin na lang nga higugmaon ko nimo ug unya magmalipayon tang duha,” ug natay-og ang abaga ni Peter sa iyang paghilak. (Katapusan)