Ang diploma ni Inday

Puwerteng lipaya ni Noy Roman ug Nang Saling pagkadawat sa sulat ni Inday nga bugtong nilang anak. Gihagkan-hagkan ni Nang Saling ang sulat.

“Sus, human sa lima ka tuig nga panimpalad ni Inday sa siyudad, mopauli na gyud siya dinhi sa atong banika.” Mapagarbuhon kaayo si Noy Roman. “Nakahuman na gyud siya’g koleds.”

“Pastilan no, Roman, kawa gyud nako magdahom nga mapropesyonal si Inday nga may pagka bugo man siya sa klase. Apan sagdi lang, gikaluy-an gyud tingali siya sa Diyos.” Naglambi ang mga ngabil ni Nang Saling nga midayeg sa ilang anak ni noy Roman.

“Pagdakop og lima ka manok, Saling, aron malaming. Ihawon nato pag-abot ni Inday. Sunod semana man kaha siya mopauli dinhi?”

“Mao may iyang sulti aning iyang suwat, Roman.”

“Siguradong gimingaw na ang atong pinanggang anak sa kinapayasang manok bisaya, Saling.”

Pag-graduwar sa hayiskol sa ilang dapit sa bukirang bahin sa Binawbaw, nanimpalad dayon si Inday sa siyudad. Maoy iyang pangandoy nga mahimong maestra. Misugot na lang sab sila si Noy Roman ug Nang Saling kay dili man sila makagasto sa kurso nga gusto ni Inday. Gamay ra man gud ang luna nga ilang giuma. Namuhi lang sab sila og mga manok nga igbabaligya. Bisa’g bugtong anak nila si Inday, apan naglisod gyud sila sa pagpa-edukar niini.

Ug karon, human molabay ang lima ka tuig mopauli na si Inday sa ilang dapit sa Binawbaw nga ang panginabuhi sa mga tawo mao ang pagpanguma ug pagpamuhi’g kahayopan.

Ug milabay ang usa ka semana.

Puwerteng gakos ug halok ni Nang Saling kang Inday. Si Inday lang ang natingban sa iyang pagtagad. Wala niya panumbalinga ang usa ka binuhat nga gikugos ni Inday. Apan si noy Roman, mora’g giugbok sa gitindogan. Unsaon, iya mang nasud-ong ang gikugos ni Inday.

“Salamat intawon nga nia ka na, Inday. Sus, mingawa namo ni Roman nimo, uy.”

Unya...

Uha! Uha! Uha!

Naigking si Nang Saling. Karon pa siya makamatikod sa gikugos  ni Inday. Nahasibog siya. Mitan-aw siya kang Roman.  Naglisod  na nuon siya pagginhawa. Kakuyapon siya.

Apan ang tanan kadali rang nakapahasol sa magtiayong tigulang. Naglumba sila pagkuha sa batang masuso nga gikugos ni Inday. Ang giingong diploma ni Inday mao diay ang iyang anak.

“Nailad ko, Nay, Tay. Gibiyaan ko sa amahan ana pagkasayod nga mabdos ko.” Nagpamahid si Inday sa iyang mga luha.

“Sagdi lang gud, Inday. Grasya ni, uy, gikan sa langit.” Nagkatawa si Noy Roman nga nagkugos sa bata samtang iya kining gisayaw-sayaw.

“Ako na say kugos, bi, Roman. Ako na say sayaw-sayaw sa atong apo.”

Ang bata nga nakauyon sa pagsayaw-sayaw ni Nang Saling, nakatulog. Nalipay si Inday nga gidawat gihapon siya sa iyang mga ginikanan bisan nadisgrasya siya sa siyudad. Misaad siya nga magpabilin na lang sa ilang banika ug motabang sa iyang mga ginikanan sa pag-atiman sa gamay nilang uma. (Kataposan)