Kissamae ug ang gitarista

Gula 1

Init kaayo ang panahon. Nagkasabot ang magbarkada nga si Fe ug Kissamae nga magpabugnaw pinaagi sa pagsuroy-suroy sa department stores sa downtown sa dakbayan sa Sugbo.

Nagkasabot sila si Fe ug Kissamae nga adto magkita sa second floor sa department store duol sa sports section. Alas 12 pa lang gani sa udto, didto na si Kissame sa department store kay wala na makaantos sa kainit sa panahon didto sa iyang gipuy-an. Pareho sila si Fe ug Kissamae nga call center agents ug dungan ang ila’ng duty sa gabii ug susama usab ang ilang day off sa adlaw’ng Miyerkules. Nagkalingaw si Kissamae pagsuroy-suroy samtang wala pa ang iyang amiga.

Nakadungog si Kissamae nga adunay nagtugtog og nindot kaayo nga tukar gamit ang electric guitar. Anam-anam niya nga gitultol ang gigikanan sa tugtog. Nalantawan ni Kissamae nga adunay gipundokan sa unahan duol sa sports section.

May nagtukar diay gamit ang electric guitar isip kabahin sa pakulo sa tindahan aron masuwayan ang baligya nila nga siyesta. Nahimuot kaayo si Kissamae nga naminaw sa tugtog sanglit sa gamay pa siya didto man siya magtubo sa Tabogon.

Gani bisan karon nga dalaga na si Kissamae madungog pa man niya ang mao nga mga tugtog kun mopauli siya sa ilang baryo nga gitawag og Kanaw-Kanaw, usa ka bukid nga bahin sa Tabogon. Nakabantay ang batan-on nga gitarista nga nahimuot si Kissamae nga naminaw sa ilang mga tugtog. Usahay magpabilib na ang gitarista, dili na gani motan-aw sa iyang kamot nga mohapoy-hapoy sa mga tratse sa siyesta.

Mipahiyom kang Kissamae ang gitarista. “Duna ka’y paborito nga song? Basin og makamao ko nga motukar?” giingnan sa gitarista si Kissamae. Mibawos pagpahiyom si Kissamae ug naghuna-huna kun unsa’y iyang i-request.

“Suwayi kuno ang Sleepy Shores kay kinaham kaayo na sa akong Papa,” ni Kissamae pa nga nagpahiyom. Tuod, misugod dayon sa pagpasakalye ang gitarista ug gitugtog ang gi-request nga tugtog ni Kissamae.

Nalipay kaayo si Kissamae nga nakadungog sa mao nga huni nga kanunay niya nga madunggan kay balik-balikon man kini sa iyang Papa pagpatugtog. Gisundan pa gayud ni Kissamae pag-request.

Mi-ring ang selpon ni Kissamae. Ang iyang amiga nga si Fe maoy nanawag ug gitug-anan niya nga anaa siya sa nagtukar gamit ang guitar. Wala madugay miabot si Fe. “Nindot kaayo siya motukar day, kuha g’yud niya ang tugtog, mora’g original,” ni Kissamae pa. “Unsay inyong mga ngalan mga guwapa?” gipangutana sila sa gitarista. (Sumpayan)