Isla Paraiso

Gula 166

Nasihag ni Rey sa panagway ni sister Veronica ang kasubo.

“U-unsay nahitabo kanimo, sister Veronica?” Wala na makapugong sa pagpangutana si Rey.

Wala’y tubag. Usa ka lawom nga panghupaw ang nabati ni Rey gikan sa madre.

Mahingawaon kaayo ang tinutokan ni Rey ngadto kang sister Veronica. Karon, bisan wala mosulti si sister Veronica kaniya, apan naseguro niya nga may nakahasol sa hunahuna niini. Kun unsa man kini, mao kini ang gusto niyang sutaon. Dili siya buot nga magmasulob-on si sister Veronica. Gusto siya nga makita ang iyang hinigugma nga kanunay malipayon. Mao nga andam siya sa pagtabang kang sister Veronica  aron mawagtang ang kahasol nga gibati niini.

“What’s wrong, sister Veronica?” Laing pangutana ang gipasupot ni Rey. “May problema ka ba?”

“Nothing wrong, I guess, Rey,” mubong tubag sa madre nga wala motan-aw kaniya. Milikay kini sa pagpakigtinutokay kaniya.

“Unya nganong ingon ka man niana karon?” Wala’y tubag.

“Dili ka makalimod kanako, sister Veronica. Klaro kaayo nga may nakahasol sa imong hunahuna karon. Kun unsa man kana, palihog sultihi ako kay basin makatabang ako pagsulbad niana.”

“Kun isulti ko kini kanimo, Rey, anha na diha magsugod ang problema.”

“U-unsa?” Mikunot ang agtang ni Rey. -- Sumpayan pa