Dili gusto’g duha

Dear Tita Salie,

Maayong adlaw ug kumusta? Magpatambag unta ko niining akong problema karon tungod kay dili ko segurado kun husto ba ang akong gibuhat o dili.

Tagoa lang ko sa ngalan nga Mr. K., ulitawo pa ko ug duna koy nauyab sa selpon lang. Na-inlove man god ko niya, Tita Salie dihang nagsige mi og teksanay mao nga ako siyang gipanguyaban bisan kun wala pa kami magkita.

Matud niya nga duna na siya’y uyab ug mag one year na sila. Pero iya lang gihapon ko nga gisugot, Tita Salie. Ug pagkaugma human ko niya gisugot nagkita dayon mi. Apan ako lang siyang gibulagan tungod kay dili ko gusto nga duha mi kabuok nga iyang uyab.

Husto ba ang akong gibuhat, Tita Salie? Nga gibulagan nako siya? Palihog tabangi ug pasabta ko. Thanks and more power to your column.

* * *

Maayong adlaw,

 If you want to make any decision, make it sure nga imo na nga gihunahuna pag-ayo aron padayon na ang dagan sa imong hunahuna ug aron usab dili ka mahimong walay klaro ug walay baroganan.

Ganahan ko sa imong prinsipyo nga gisunod nga dili ganahan og doble ang hinigugma kay alang kanako usa ra ang atong kasingkasing dapat usa ra usab ang lalaki nga atong higugmaon.

Ang kinahanglan lang nimo mao nga dapat strong ka sa imong mga hukom. Ayaw sudli ang mga butang kondili pa nimo klaro ug dili pa ka segurado.

Husto ka sa imong hukom nga bulagan siya tungod kay dili man ka ganahan nga duha mo sa iyang kinabuhi. Ang dili lang maayo nimong gibuhat kay misugot pa ka nga dawaton niya ang imong gugma bisan nasayod na ka daan nga may uyab na siya, ug pagkita ninyo imo ra diay siyang gibulagan.

-- Tita Salie