Isla Paraiso - Gula 162
Gitak-opan ni sister Veronica ang Bibliya ug giuli kini sa ibabaw sa gamay’ng lamesa. Ang mga pulong nga iyang nabasa ingon sa gipahaom gayod alang kaniya. Gibati niya nga ingon sa siya maoy giigo sa mensahe sa mga bersikulo nga iyang gibasa. Inay nga mahupay ang iyang gibati, misamot na hinuon ang iyang kahasol.
Mibalik si sister Veronica paghigda. Misamot karon kagubot ang iyang hunahuna. Gikan nga naghayang, mikulob siya. Giumod niya ang iyang nawong sa iyang unlan. Unsay angay niyang buhaton karon? Sa mga pulong nga giluwatan ni Padre Judas ug sa mga bersikulo nga iyang nabasa sa Balaang kasulatan, iya na hinuong gibati nga wala ikahimuot sa Diyos ang iyang hukom pagluwat sa iyang bokasyon. Mora ba’g ang madre superyor na lang maoy iyang kadapig.
Gibati niya karon nga sayop ang iyang pagsabot ug pagtugkad sa kabubut-on sa Diyos alang kaniya. Mora ba’g imbes ang kabubut-on sa Diyos maoy iyang sundon, mao na hinuon ang iyang gituman ang iyang kaugalingong kagustohan.
Unya, milabok sa iyang hunahuna ang mga pulong nga giluwatan sa madre superyor usa niana ka higayon sa ilang panagsulti. “Kinahanglang magmatinud-anon ka sa imong kaugalingon, sister Veronica.â€
Matinud-anon ba gayod ako sa akong kaugalingon? Gikasukot kini sa maanyag nga madre sa hilom sa iyang kaugalingon. -- Sumpayan pa
- Latest
