Utlanan sa gugma

Ulahi na nga nakaamgo si Terence nga dapat may utlanan ang gugma. Nia na siya sulod sa prisohan. Dako og bugti ang leksiyon nga iyang nakat-unan. Napulo ka tuig nga pagkabilanggo. Apan nakahukom siya nga magbinut-an sulod sa bilanggoan. Aron maparol siya ug makabag-o sa iyang kinabuhi. Ug nagpasalamat siya nga nabilanggo. Aron daghan siya’g higayon nga  makapamalandong sa iyang nabuhat.

Usa ka call center agent si Terence. Dako og suweldo. Ulitawo. Kay dako’g sweldo, way gibuhi, kanunay siyang good time sa mga night spots. Nahimamat niya si Roxanne nga usa sab ka call center agent. Solo lang sab si Roxanne. Way igsoon o paryenteng nagsalig niya. Puro sila pinasagdan sa ilang mga ginikanan nga bisi sab sa ilang mga negosyo ug bisyo.

Nagbisyo sab sila’g ila. Nag-eksperimento sila sa drugas. Nindot ilang gibati. Kun high silang duha, molami pagsamot ilang paghilawas. Hangtud nga di na paigo ilang mga suweldo sa ilang bisyo. Nakat-on sila’g pangutang. Puno na tanan ilang mga credit cards. Nakat-on sila’g pangawkaw sa salapi sa ilang kompanya. Nataktak sila’s trabaho. Nakat-on sila’g pangilad. Ug nagsaaray sila nga mag-uban sa kalipay ug kasakit. Dako og gugma si Terence ni Roxanne. Sa tanang babaye nga nauyab ni Terence, si Roxanne ang pinakamaanyag. Naadik sab siya ni Roxanne. Dili kay sa drugas lang.

“Nahigugma ka ba gayud nako, Ter?” ni Roxanne, usa ka higayong naghinabi sila sulod sa mabugnaw’ng motel.

“Sangko sa langit akong gugma nimo, Rox” ni Terence. “Mosugot ka bisa’g unsay akong isugyot nimo?” ni Roxanne.

“Unsa man?” ni Terence.

“Mosugot ba lagi ka? Wa na man tay kuwarta. Wa na tay pangita” ni Roxanne.

“Sugot! Basta, di lang ko nimo biyaan” ni Terence.

“Puol na man atong kahimtang. Gusto na man gani unta kong makigbuwag nimo,” ni Roxanne.

“Ay lang ko’g buwagi, Rox. Sugot ko bisa’g unsay ipabuhat nimo nako” ni Terence.

“Panulis” ni Roxanne.

Kaduha ra nilampos si Terence sa pagpanulis. Ikatulo nadakpan na siya. Wa na siya’y balita kun hain na si Roxanne.

Nakapanghupaw si Terence. Usa ka tuig na siya’s prisohan. Naanad na siya nga way drugas. Ug way Roxanne sa iyang kinabuhi. Nagtoon na sab siya’g Bibliya. Ug nakapahiyom siya’s iyang nakat-onan. Bililhon alang niya iyang nakat-onan.

“Kun mahigugma ko pag-usab, binlan nako og gugma akong kaugalingon. Kay sa ingon, dunay utlanan ang gugma sa laing binuhat. Ug dili na ko pamandar kun pabuhaton ko’g dautan. Kay ang gugma nako sa akong kaugalingon, magtudlo nako sa dili pagbuhat og dautan” tuaw ni Terence sa hilom. (Katapusan)