Tilaw-tilaw lang

Gula 2

Paspas sila si Brady ug ang tulo ka dalagita nga nanglakaw paingon sa iyang kotse nga giparada sa atbang sa karsada. Didto gipalingkod ni Brady tupad kaniya sa front seat ang dalagita nga iyang naibgan.

“Asa man ta mangaligo?” matud sa tabian nga dalagita nga diha maglingkod sa iyang luyo. Misugod na pagpadagan si Brady sa awto ug giawhag niya ang mga dalagita nga magpaila sa ilang ngalan.

Nancy diay ang ngalan sa dalagita nga naibgan ni Brady nga diha maglingkod sa front seat tupad kaniya. Sila si Sheila ug Alexis ang naglingkod sa likod nga lingkoranan. “Naa ra sa ubos ang among balay,” giingnan si Brady samtang nagsubay sila sa taytayan sa SRP ug gidung-aw nila ang sitio Bato sa Barangay Ermita.

“Mao ba? Sa ato pa naapil diay pagkasunog ang inyong balay kaniadto?” giingnan ni Brady ang mga dalagita. Nakagusto g’yud kaayo si Brady sa kinaiya ni Nancy kay hilumon kini nga pagka-babaye kanila’ng tulo.

Taud-taud, mi-ring ang selpon ni Brady. Si Cardo nga iyang amigo sa Barangay Cansojong maoy nanawag kaniya. “Bai, duna ko’y kuyog nga mga chicks, mangaligo na lang ta sa dagat, hapiton ka namo,” giingnan ni Brady ang higala.

Nahuna-huna ni Brady nga mas nindot nga ikuyog niya si Cardo kay suheto kini sa Talisay ug sayon ra nga makapangita sila og maayo nga kaligoan. Wala madugay didto na sila sa Cansojong. Gibosenahan ni Brady ang higala pagkatungod na sa sakyanan sa iyang balay.

Migawas si Cardo nga nagngisi ug gilili niini ang mga sakay sa sulod. “Uy, mga chicks g’yud diay tinuod ang imong kauban da. Cge, tana dili na lang ko mag-ilis kay nag-short pants na man ko,” matud ni Cardo.

Gipaila ni Brady si Cardo sa tulo ka dalagita. “Kini parts mao ni ang ako’ng girlfriend, si Nancy, kanang duha nga imong katupad mao kana sila si Sheila ug Alexis,” matud ni Brady.

Nahingangha si Nancy dihang gipaila siya ni Brady nga girlfriend ngadto ni Cardo samtang nangatawa ang duha niini ka kaubang dalagita. Gituyo kadto ni Brady kay plano niya nga panguyaban ang dalagita nga si Nancy pinaagi sa komedya.

“Sa Tubod Spring na lang ta mangaligo Brad, sa Minglanilla ba kay bugnaw kaayo karon ang tubig didto,” matud ni Cardo. “Sige, wala pa g’yud ko makaanha diha. Dugay na ko nakadungog ana,” matud ni Nancy.

Tuod, gipaspasan ni Brady ang pagpadagan sa kotse kay layo-layo diay ang ilang adtoan. (Sumpayan)