Pasayloa ko Ermetanyo

Pwerting katawa ni Elmer nga iyang gibugal bugalan ang usa ka tigulang Ermetanyo nga taas kaayo og bungot. Ug sa iyang pagbanabana kapin sa usa ka gatos ang pangidaron.

“Ermentayo, kindang kinding”, bugal bugal ni Elmer. “Dodong, ayaw pagbugal bugal sa mga tigulang kay tingali og mapareha ka nako”, tubag sa Ermentaryo. “Uy, ermentayo, dili ko motuo og gaba”, saysay ni Elmer dalang panghambog.

“Dodong, ang ako lang ikatambag kanimo nga magbinuotan ka, kay kamong mga batan-on maoy paglaom sa atong nasud”, pulong sa Ermetanyo.

“Sige nalang buhaton na nako ang imong mga tambag”, ni Elmer. Apan nasayop ang tigulang Ermetanyo kay nitando lamang kini sa atubangan. Pero sa tinud-anay lang wala kini niya tumana ug nagpadayon kini sa iyang pagka buluyagon.

Nianang pagkagabii niadto siya sa gawas sa ilang balay. Kay aron magpahayahay. Ug sa wala damha may usa ka dako ug talagsaong aninipot ang naglupadlupad padulong kaniya. Mao nga nikaratil siya sa pagdagan.

Apan nahibulong siya. Mora og adunay nipugong sa iyang mga tiil sa pagdagan. Ug sa kalit lang ang talagsaong aninipot nibatog kini sa punuan sa kahoy nga sambag duol sa ilang balay.

Ug napahasiga ang iyang mata nga iyang nakita sa dakong sanga sa punuan sa sambag nga nibatog. Kay ang iyang nakita nga aninipot nga naglupadlupad nahimo man kining tawo. Iyang gitutukan pag-ayo aron pagsiguro kung kinsa. Karon kay ang tigulang man diay nga lalake nga Ermetanyo.

“Dodong, ayaw kahadlok nako dili ko dautang tawo”, saysay sa Ermetanyo.

“Ermetanyo, wala ko magkinahanglan nimo pahawa diha”, tubag ni Elmer.

Sa  pagka walay batasan sa batan-on nangluod ang Ermetanyo kaniya. Kay gusto unta sa tigulang Ermetanyo nga makighigala kang Elmer.

Apan gipasakitan kini niya og mga pulong. Mao nga nikalit lang kahanaw ang Ermetanyo.

Usa ka hapon niana naghinuktok si Elmer sa iyang mga binuhatan. Kay lagi usa man siya ka bugalbugalon. Unya nagmahay siya tungod kay nituhop ang mga tambag sa Ermetanyo.

Sa tanto niyang paghinuktok. Nikalit lang nisakit ang iyang duha ka mga tiil. Nakuyapan siya sa iyang gidangatan. Kay sa paglakaw pa niya na pareha naman siya sa Ermetanyo nga iyang gibugal bugalan nga nagkindang kindang ang nilaktan. Pipila ka gutlo nahiwi usab ang iyang baba. Mao na karon ang nakahasol sa iyang kaugalingon. Sa adlaw’ng Domingo, nisimba siya ug nangayo kini’g pasaylo sa iyang mga sala. Hangtud nga nisulti ang pari  nga “ipakita nato ang atong panag-igsuonay”. Ug sa wala damha nakalitan siya sa iyang nakita kay ang Ermetanyo nisimba nga anaa sa iyang atubangan. Ug niyangoyango pa kaniya.

“Dong, nabati nako ang imong pagbasol. Mao nga gipasaylo na tika”, pulong sa Ermetanyo. Sa kadakong kahibulong ni Elmer, naayo na ang nahiwi niyang baba. Ug naayo usab ang iyang mga tiil nga nagkindang kindang sa paglakaw. “Sa akong gibuhat nakaamgo nako. Pasayloa ko Ermetanyo”, saysay ni Elmer. (Kataposan)