Isla Paraiso - Gula 159

“Usa ikaw ka alagad sa Diyos, sister Veronica,” namulong na usab si Padre Judas. “Talagsa ra ang mga binuhat nga gitugahan nianang talagsaong kahigayonan nga makaalagad sa Diyos. Diyotay ra ang pinili sa daghan nga gipangtawag.

 Ug bulahan ikaw sa napilian. Karon...kun moluwat ka sa imong bokasyon, sama da sa giusikan mo ang mabulokong kahigayonan nga gihatag sa Diyos kanimo. Ug anugon kaayo, sister Veronica, tungod kay ka usa ra moabot sa atong kinabuhi ang suwerte, sumala sa karaang panultihon.”

Human sa taas-taas nga panagsulti nila ni sister Veronica ug Padre Judas, ang madre misulod sa iyang lawak nga ingon sa wala sa kaugalingon. Naghigda siya sa mahunolhunol nga kama nga nagpitawpitaw ang mga mata. Mihasol karon sa iyang hunahuna ang tumang kalibog. Gubot kaayo ang iyang kaisipan.

Wala siya masayod kun kang kinsang panahom ang angay niyang kalawaton karon ang kang Padre Judas ba o ang sa iya sa madre superyor. Wala’y pagsupak ang madre superyor sa iyang hukom sa pagluwat sa iyang bokasyon. Mao pa gani kini ang midasig kaniya sa paghimo sa ingon uban ang pahimangno nga kini gayod ang angay buhaton nga kini maoy makaayo alang kaniya. Sa laing bahin, si Padre Judas wala usab mobabag sa iyang hukom. Apan hugtanon kining mimaymay sa pagpasabot kaniya sa mga butang nga undanon ug may basehanan. -- Sumpayan pa