Bayad sa Pagtabang - Gula 4

Gihikay ni Kent ang mga dukomento aron makagawas na sa ospital si Lynlyn. “Oki na Lyn, makahimo ka na nga mogawas sa ospital. Nabayran na nako ang obligasyon,” giingnan ni Kent si Lyn. “Dako na g’yud kaayo mi og utang kabubut-on nimo Dong Kent. Unsaon kaha namo sa pagbawos nimo,” matud sa inahan ni Lynlyn. Mipahiyom si Kent ug nalipay nga gikahinangop sa mga ginikanan ni Lynlyn ang iyang gihimong pagtabang kanila. “Puslan man nga nahinaykan na nako’g tabang ni Lynlyn, ako na lang mo nga ihatud sa Alcoy kay nag-leave man ‘sab ko og tulo ka adlaw. Nananghid ko sa opisina nga naospital ang suod nako sa pamilya,” matud ni Kent.

Tuod, gihatud ni Kent sakay sa iyang kotse si Lynlyn. Sa atubangan nga lingkoranan niya gipalingkod ang dalaga samtang ang iyang mga ginikanan didto sa luyo. Pag-abot nila sa Dalaguete, gihunong ni Kent ang kotse sa dapit nga didto niya makit-i si Lynlyn. “Uy, wala na man diha ang imong motor nga gigaid nako sa tindahan Lyn?” giingnan ni Kent ang dalaga. Gitug-anan sila sa amahan ni Lynlyn nga gikuha na sa maguwang ni Lynlyn ang motorsiklo. Mipadayon sila pagbiyahe paingon sa Alcoy. “Naa ra ang among balay Kent sa Daang-Lungsod… daplin ra sa karsada. Wala’y laing balay nga makita nimo nga nahimutang ilawom sa daku’ng punoan sa acacia,” matud ni Lynlyn

Gisugat sila sa mga silingan ni Lynlyn. Gipaila-ila sa dalaga si Kent ngadto sa iyang mga kabanay ug kahigalaan nga misugat. “Maayo gani kay buotan ang tawo nga nakakita nimo Lyn ug gidala ka dayon sa ospital,” matud sa usa ka paryente ni Lyn.

Mibalik si Kent sa iyang kotse. Gisunod siya ni Lynlyn. “Puwede kun ugma ka na lang mopauli Kent? Anhi usa ta sa amo kay mingawon ko nimo nga mobuwag dayon nga bag-o pa ko nakagawas sa ospital,” ni Lynlyn pa.

Nahimuot sa hilom si Kent sa pagdapit ni Lynlyn nga magpabilin usa siya sa ilang dapit. “Sige, no problem Lyn. Nag-leave man ‘sab ko sa akong trabaho,” dali nga tubag ni Kent.  Wala gayud mobuwag kang Kent si Lynlyn. “Ganahan ka nga mosuroy Kent, adto ta sa baybayon. Dili man kaayo layo gikan dinhi ang baybayon,” matud ni Lynlyn. Human makapananghid, nanakay sila si Lynlyn ug Kent sa awto.

Tuod, usa ka maanindot nga dapit ang ilang giadto. “Lyn, anhi ba kamo magsuroyan ug kadtong imong boyfriend nga tua sa abroad?” Wala makapugong si Kent pagpangutana human mahinumdom nga si Lynlyn adunay boyfriend nga tua sa gawas. “Dili nato siya estoryahan Kent kay kita man ang kauban karon,” ni Lynlyn pa. (Sumpayan)