Isla Paraiso - Gula 152

Samtang nangaon, ang mga madre nagbanosbanos pagpangutana kang Padre Judas mahitungod sa iyang kinabuhi didto sa Estados Unidos. Ang pari misugilon kanila sa iyang mga kasinatian sa iyang pagpuyo didto sa nasud sa mga tag-as og ilong.

Tapos ang panihapon, sila si Padre Judas ug madre superyor nakahigayon pagsultihanay nga sila ra. Nagpakisayod ang pari mahitungod sa ilang kahimtang sa kombento. Nagpakisusi siya mahitungod kanila ni sister Veronica ug sa ubang mga madre sa kombento ilabi na gayod sa iyang mga suod. Wala pa sila magkasulti si sister Veronica ug Padre Judas. Kaganina sa iyang pag-abot, igo lang silang nagkumostahay.

Ang madre superyor misugilon sa tanan nga iyang nasayran bahin kang sister Veronica ngadto kang Padre Judas. Nakugang ang pari pagkasayod nga ang maanyag nga madre nga iyang higala nakahukom paggawas sa kombento. Nakapanglingo siya nga ingon sa mibati’g kahingawa sagol kahinugon kang sister Veronica. Wala siya magdahom nga mao kini mosantop sa hunahuna sa madre.

Human sa ilang panagsulti sa madre superyor, si Padre Judas misulod na sa lawak nga giandam alang kaniya aron mopahulay. Mga alas nuybe na ang takna niadtong tungora. Gikapoy siya sa biyahe. Apan wala siya mobati’g katulogon sa iyang paghigda. Nagpitawpitaw ang iyang mga mata nga gitutok sa kisame. Si sister Veronica maoy diha sa iyang hunahuna. -- Sumpayan pa