Isla Paraiso - Gula 151

“Paningkamotan ko nga makaanha karong gabii,” ni Rey pa.

“Dili puwede,” mubong tubag ni Veronica.

“H-ha?” Ingon sa nahikugang si Rey. Nga-ngano man?”

“Basin og dili ko ikaw matagad pag-ayo,” ni sister Veronica pa.

“Ngano man lagi?”

“May moabot unyang alas singko diri sa kombento. Usa ka pari. Gikan pa   siya sa Amerika.”

“Mao ba?” Ang nasulti na lamang ni Rey.

“Tingali’g sa sunod gabii puwede na,” ni sister Veronica. “Magsulti lang ta pag-usab ugma. Tawgi ko sa telepono.”

“Ikaw ang mag-igo.”

Ug tapos magpanamilitay, gibutang na nila ang awditibo.

Si Padre Judas miabot sa Orchids Sisters Convent lapas ang ikaunom ang takna sa sayong kagabhion. Wala na siya magpasugat sa airport. Dili siya buot nga mahasol pa ang mga tawo sa kombento sa iyang pag-abot. Total, nakatultol man siya sa kombento.

Nahitabo ang daklit nga hangpanay, kumustahay ug pig-itay sa kamot sulod sa kombento. Nagkapuliki si Padre Judas sa pagdawat sa mga kamot nga nagbanos-banos paglamano kaniya.

Human sa maong malipayong mga gutlo, nangaon ang tanan sa usa ka hataas nga lamesa sulod sa luho nga dining room sa kombento. -- Sumpayan pa