Biyahe sa Manila - Gula 3

Misugyot si Janet kang Alex nga ibilin lang usa niya ang iyang bag sa kwarto ug hapiton ra niya kini gikan sila nga mag-dinner. Gihatud ni Alex ang bag ni Janet sa iyang kwarto.

Taud-taud, mibalik si Alex human mapahimutang ang gamit sa kwarto sa hotel. “Agad lang ko nimo Janet kun asa gusto nimo nga adto ta mag-dinner. Ako’y bahala,” giingnan ni Alex ang dalaga.

Nakasabot si Janet nga dunay kwarta si Alex apan ang problema mao nga dili pa kini suheto sa Manila. Gidala ni Janet si Alex didto sa floating restaurant nga diha ra usab sa Roxas Boulevard.

“Wala g’yud ko magtoo Jan nga makabaton ko og maanyag nga tour guide pag-anhi nako sa Manila. Unsaon, gipadali-dali ko sa among manager nga maoy morepresentar kaniya kay dili siya makatambong,” matud ni Alex.

Human sila mag-dinner, nanuroy sila sa duol nga Luneta.  Nalingaw kaayo si Alex kay sukad-masukad, karon ra siya nakasuroy sa Luneta. Daghan nga managhigugmaay nga nagdeyt sa Luneta. “Mangita ta og kalingkoran Jan kay bag-o pa ta’ng kaon. Adto ta magkalingaw og sultihanay sa atong mga kaagi. Wala ka man kaha magdali,” giingnan ni Alex si Janet. Girombo nila ang bakante nga lingkoranang semento nga nag-atubang sa monumento ni Rizal.

“Abi baya nako ganina og estrikto ka Lex mao nga nagduha-duha ko paghangyo nga mag-change ta’g lingkoranan sa plane,” matud ni Janet nga nagpahiyom. Dili ko estrikto Jan, aw bisan pa man tingali og estrikto ang lalaki malukmay g’yud siya sa hangyo sa babaye nga napatung-an sa paglingkod sa duha ka lalaki. Dali ra nga nagsuod sila si Janet ug Alex. Diha’ng hapit na tunga’ng gabii, namalik na sila sa hotel. “Mopauli ka pa ba karon sa imong gipuy-an?” gisukna ni Alex ang dalaga. “Aw O, daghan man’g taksi nga kasakyan. Inignaug nako, mao na man dayon ang akong apartment.”

Naghuwat ra sa lobby sa hotel si Janet. Wala madugay, mibalik na si Alex nga nagdala sa bag sa dalaga. “Sigi, bye Lex, mokontak ra unya ko nimo dinhi sa hotel,” ni Janet pa. Diha pa nakahinumdom si Alex nga wala man diay sila magkabayloay og contact numbers.

Mikuot si Alex sa iyang pitaka ug mikuha’g calling card ug gitunol kang Janet. “Thank you,” matud ni Janet sa dayong dawat sa calling card.

Misakay si Janet sa nag-waiting na nga taksi sa gawas sa hotel. Gisundan paglantaw ni Alex ang taksi nga giluwanan ni Janet. Gibuhian niya ang matam-is nga pahiyom. – (Sumpayan)