Diyos ko, Diyos ko, nganong gibiyaan mo ako

Alang kanako, may pinalabi ang Diyos, Bay Romy...!  “Nganong nakasulti man ka og ingon niana, Bay Pete...?”

“Pila na ka tuig nga nag-ampo ko kaniya nga hatagan og maayong trabaho, hatagan ko’g babaye nga mahimo kong asawa, hatagan og nindot nga balay ug mahaw-as ko’s kakabos dinhi sa eskuwater. Apan wa gyud ko dungga sa Diyos. Naay uban nga haruhay na’g kahimtang, mao nuoy giuna sa Diyos sa pagtabang! Inanay na gyud kong nawad-an og pagtuo ug pagsalig sa atong Ginoo, Bay Romy....!”

“Ayaw pagsulti og ingon niana, Bay Pete! Kay kun mangayo ka’s Ginoo, hatagan ka. Kun mangita ka, makakaplag ka. Ug kun manuktok ka, ablihan ka usab...! Basta kinasingkasing ang imong pag-ampo ug pagpangayo nga nuntan sa buhat...!”

“Nasum-olan na ko’g paminaw anang mga pulonga, Bay Romy! Hangtud karon, nagpabilin kong usa ka kaswal nga trabahador sa city hall nga college level man unta ko ug napulo na ka tuig nga nagtrabaho. Ang uban nga hayskol gradweyt lang ug uwahi pa nako, naregular na’s puwesto. Nag-antos ko’g puyo ning giabangang balay dinhi sa eskuwater. Wa say babayeng makigrelasyon nako, kay bati kuno ko’g nawong! Natugkad ko nga gibiyaan gyud kos Diyos, Bay Romy....!”

“Kulang ka’s kinasingkasing ug makanunayon nga pag-ampo sa atong Ginoo, Bay Pete! Tan-awa ra god ko, usa lang ka basurero matag adlaw nga kanunay’ng magdusoduso sa akong karomata aron mangita og mahalin nga basura sa kadalanan. Unya, nagsayidlayen ko’g newsboy sa Banat News matag kaadlawon ug buntag. Manuroy sab ko’g balut matag gabii. Kayod taman sa ginhawa ba ug nag-ampo kanunay sa Ginoo nga hatagan ko’g kaharuhay sa kinabuhi. Puyra buyag, milahutay ko, nakapatukod og balay ug naa pay savings sa banko.

“Nya, naa na kay asawa, Bay Romy....?”

“Naa na koy uyab, Bay Pete! Usa ka bag-ong maestra! Ayaw lang gyud pagkawala sa paglaom, Bay Pete! Sangpit lang gyud kanunay sa Diyos ug ubani sa buhat! Nasayod na siya sa tanan natong gikinahanglan. Usahay, dili dihadiha nga ihatag niya ang atong gipangayo! Dunay takdang panahon nga iyang gitagana nato. Timan-i lang nga sa kanunay, dili ug dili gyud ta biyaan sa Diyos...!”

“Hmmm! Natugkad karon nako nga hugot gyud diay ang imong pagtuo, pagsalig ug pag-ila kang Hesus nga atong Diyos, Hari ug Manluluwas, Bay, Romy...!”

“Oo, Bay Pete! Busa, papasa sa imong hunahuna nga gibiyaan kita sa Diyos, sama sa gisinggit ni Hesus samtang nagdupa nga gilansang sa krus atol sa Biyernes Santo, “Diyos Ko, Diyos Ko, Nganong Gibiyaan Mo Ako...!” Kay sa gikaingon ko na, Bay Pete, dili gyud ta biyaan sa Diyos....!”

“Salamat sa pagpasabot mo nako, Bay Romy! Sa imong gipaambit karon kanako, atol ning kasaulogan sa Semana Santa, nahuwasan ko’s kaugalingon ug nakita ko ang lunsay’ng kamatuoran! Salamat....!” (Kataposan)