Biyahe sa Manila

Dinali-dali ang paglarga ni Alex paingon sa Manila kay gisugo siya sa ilang manager nga maoy morepresentar sa ilang kompaniya sa usa ka seminar.

Gikulbaan si Alex kay una pa kini nga higayon nga moadto siya sa Manila nga siya ra’ng usa. Hapon na ang iya’ng flight ug mga alas singko sa hapon ang gikatakda nga oras sa iyang pag-abot sa Manila.

Gipili ni Alex ang lingkoranan nga daplin sa bentana sa eroplano aron siya makakita sa palibot samtang maglupad sila sa kahanginan. Batan-ong babaye ang iyang gikatupad ug diha kini maglingkod sa kinatung-an sa tulo ka lingkoranan. Nagkalingaw si Alex pagbasa-basa sa newspaper nga diha gipalugpitan sa sandiganan sa iyang atubangan. Nasabtan niya nga wala mahimutang ang babaye nga diha sa iyang wala naglingkod.

Napatung-an man gud ang babaye ni Alex ug sa lain nga lalaki nga didto sa Seat-C mag-ukopar. “Excuse me, pwede ko mohangyo nga mag-ilis lang unta ta og seat? Ako lang unta ang diha sa daplin,” paraygon nga tingog sa babaye ngadto ni Alex.

Dali kaayo nga nakatando si Alex. “No problem, sige ikaw diri sa Seat-A kay aron makatan-aw ka sa palibot,” ni Alex pa. Mitindog si Alex ug migawas aron makabalhin ang babaye sa gilingkoran niya habig sa bentana sa plane. “Salamat kaayo ha? Natung-an man gud ko og duha ka laki, dili kaayo ko comfortable,” matud sa babaye ngadto ni Alex. Taud-taud, misibog na ang plane gikan sa tarmak sa Mactan Airport ug mipaingon na kini sa unahan nga bahin sa runway. Mihunong ang abyon ug daw nanukad kini aron modagan pagkusog sa dayon na’ng lupad.

“Kuyawan g’yud kaayo ko sa dayon inig nga take off sa plane uy,” matud sa babaye nga daw sa nagpadungog-dungog ni Alex. Masabot ni Alex nga daw nangati og pakigsultihanay ang babaye.

Tuod man, misutoy na sa pagdagan ang plane ug dayon milupad na kini paingon sa Manila. Daw nagtungas kini sa bungtod kay maila man sa porma sa abyon nga ingon sa naghangad.

“Gabii na ta moabot sa Manila no?” matud ni Alex ngadto sa babaye. “Mga past five, abot na ta kay one hour kapin ra man ang biyahe,” dali’ng tubag sa babaye. “Alex diay akong ngalan miss,” paila ni Alex ngadto sa babaye. Mipahiyom ang babaye ug milingi ni Alex. “I’m Janet,” sa babaye pa. Nagbayloay sila og pahiyom ug nagkalingaw og sultihanay. Gibalik ni Alex ang newspaper sa gibutangan niini. “Kanunay ka ba Janet nga mag-adtoan sa Manila?” pasakalye ni Alex. (Sumpayan)