Ungo nga dili kamaong molupad

Sukad mahimong mga ungo ang pamilya ni Osting nagubot ang sityo Banagbanag sa kalit nga pagdagsang sa daghang mga ungo. Kay kanunay man sila makadungog matag gabii og mga suliyaw sa mga tingog sa wakwak. Sa paminaw nila balig unom gyud ka tingog nga magpulipuli. Ug tungod niini nakahukom na si Kapitan Baldo nga matag gabii magbantay gyud sila, labi na ang iyang mga tanod ug adto na moundang inig duol na ang kaadlawon.

“Sila kana si Osting, Tisoy, uy,” ni Aida pa nga asawa ni Tisoy. “Sukad nga nia kana sila dinhi puyo sa ato, mitumaw pud ang mga wakwak...”

“Nganong nakasulti man ka, Aida, ana,” ni Tisoy pa.

“Gipatakdan man kuno na si Osting pagka-ungo,” tubag ni Aida. “Si Tasia ang nagsulti, kay dugay man kuno nang nagluya si Osting.”

“Unya kinsa may nagpatakod?” miiknat ang kilay ni Tisoy.

“Si Doroy. Kaila kang Doroy?”

“Kaila man. Kanang mamalit og baboy nga taga sityo Ugis?” mitan-aw si Tisoy sa iyang asawa. “Amigo man kaayo nang Osting, kay kompare man na sila...”

“Mao na, nga puwerte nang ungoa anang pamilya ron. Ambot kun sila ba gyung tanan. Pito man na sila ka buok apan sa akong paminaw mora’g unom ra maoy magpulipuli’g wakwak nga langgis kaayong paminawon,” midiyong ang mga mata ni Aida.

Kini si Aida ug Tisoy taga dinhi gyud sa sityo Banagbanag ug may anak silang ulitawo nga si Damian. Kini si Damian uyab ni Liza, ang dalagang anak nila ni Osting-Tanya. Tungod niini, naguol si Aida ug lakip na si Tisoy.

Unya, unsaon na man lang unya ni Aida, nga uyab ra bang Damian kana si Liza, kakuyaw kun mao na.”

“Aw, atong pabuwagan ni Damian,” ni Aida nga mora’g napungot kay lagmit matakdan gyud unya si Damian kun magpadayon ang ilang relasyon.

“Mahimo kaha nang Damian nga puwerte man na siyang gugmaha anang bayhana,” ni Tisoy nga nagpanglingolingo.

“Aw, ato gyud siyang sultihan og tarong ug pasabton.” Ug misulod si Aida sa kusina aron magluto sa ilang panihapon.

Pagka-gabii, ilang gipaabot si Damian apan wala mahiuli ug dihang gitan-aw nila ang nagbitay nga taknaan sa bungbong nagtug-an nga alas diyes na sa gabii. Taudtaod may nagwakwak. Apan diha kini nila mabati sa may tugkaran. “Wakkkk...wakkkk... wakkkkk...wakkkk!!!” Ug unya kalit nga mihunong. Taudtaod misangpit si Damian, “Tay, Nay, ako kining nagwakwak, Nay, Tay kay gipatakdan kong Liza, di pa ko kamaong molupad, Tay, Nay, nagtuon pa ko...” Ug kahilakon dalang kalagot ang gibati karon ni Aida. (Kataposan)