Ulahi na ang pagbasol - Gula 7

Milabay ang mga adlaw, nagkasuod na pag-ayo sila si Gelyn ug Randy. “Dili ba kaha ko matultolan ni David dinhi sa inyo no? Basin og maapil ka sa among kagubot Ran?” matud ni Gelyn. Usa ka buntag, ingon sa luya ang panglawas ni Randy nga miabot gikan sa duty.

Wala gani kini makigsulti kaayo sa iyang inahan ug kang Gelyn. Gihatdan na lang kini og kape didto sa iyang kwarto. “Sus, gihilantan diay si Randy mao nga luya kaayo kini nga miabot. Asa man kaha kita makakita og momasahe niya aron mahuwasan. Dili na ko kapiog niya day,” matud sa tiguwang na nga inahan ni Randy.

Nakahinumdum si Gelyn nga duna siya’y silingan nga manghihilot sa Kalunasan, apan kun moadto si Gelyn makit-an siya sa iyang kapuyo nga si David.         

“Ako na la’y masahe ni Randy nang kay makamao man ‘sab ko og gamay sa pagmasahe,” ni Gelyn pa. Tuod, gipangita sa inahan ang gamay’ng botelya sa panghaplas ug gihatag kini niya kang Gelyn.

Nakurat si Randy nga misulod si Gelyn sa iyang kwarto. Nag-brief ra ba siya mao nga gidali ni Randy pagtabon ang iyang atubangan. “Ran, gihilantan ka diay? Masahean tika Ran,” matud ni Gelyn dungan sa pagtapion sa iyang liog.

Migawas sa kwarto ang inahan ni Gelyn. “Maikog ko nimo Gelyn nga momasahe nako, kapuyon ka unya,” ni Randy.

“Ayaw na kana paghuna-hunaa Ran, bugtian nako ang imong kaayo ug pagtabang nako. Sige atong hukason ang imong T-shirt,” matud ni Gelyn. Lalim kaayo ang gibatyag ni Randy nga gimasahean ni Gelyn. Nanguto-kuto ang iyang buko-buko nga giayo’g hapyod ni Gelyn.

Mga tunga sa oras nga nahuman og masahe ni Gelyn ang buko-buko sa higala niya nga polis. “Hayang na Ran,” ni Gelyn. Nagpanuko si Randy kay mauwaw siya nga makita ang nagtugsoy na nga si Junior nga kaganina ra nagtuskig.

Kalit lang namalik ang kapiskay ni Randy. “Gelyn, mosugot ka ba nga magtipon na lang kita isip bana ug asawa?” matud ni Randy dungan sa paggabling paghinay ni Gelyon aron makatupad kini paghigda kaniya. Wala makatingog si Gelyn. Mibarog si Randy ug gi-lock ang pultahan. Nanginit na pag-ayo ang iyang kalawasan ug misamot na katuskig si Junior. Wala mipakita’g pagsupak si Gelyn nga giparaygan siya ni Randy.

Pila ka adlaw ang milabay, miabot sa balay nilang Randy ang kapuyo ni Gelyn nga si  David nga puno sa pagbasol ug nangayo’g pasaylo ni Gelyn apan wala na siya pasayloa. “Gikasubo ko, dili na ko makigbalik nimo,” giingnan ni Gelyn ang iyang kapuyo kaniadto. (Kataposan)