Sa imong mga kamot itugyan ko ang akong kalag

Si Berto usa ka tunok sa katilingban. Ang iyang kangil-ad gitunglo sa kadaghanan. Problemang dako ni Don Esteban si Berto tungod sa kapilyo niini. Kadaghan na kini makalabuso kay manghasi ug manumbag ilabi na og mahubog uban sa iyang mga barkada.

Pinangga man gud kaayo ni Don Esteban si Berto tungod kay bugtong kining anak ug pinangayo pa gyud sa Ginoo nga mabuhi unta kay sa paghimugso ugod niini namatay man usab ang inahan. Busa giantos na lang niya ang mga buhat niini nga dautan.

Ug niining buntaga karon, sayong mibangon si Don Esteban ug naghinuktok diha sa may tamboanan sa ilang balay. Sa matag karon ug unya magpanglantaw siya sa dalan sa unahan kun wala pa ba si Berto kay gabii wala man kini mahiuli.

Giablihan ni Don Esteban ang transistor radyo. Ug maoy  iyang nabati nga gisibya nga karong alas 2 sa hapon maoy isugod sa sakripisyo sa usa ka tawo nga mao kunohay simbolo sa kinabuhi ni Hesukristo.

Naglagiting ang kainit sa Adlaw sa kuwaresma. Apan bisan sa kaalidanga sa panahon, nanagpangabot ang mga tawo nga buot mosaksi sa masulub-ong talan-awon nga maghubit sa kaagi ni Hesukristo.

Haduol na ang panon sa mga tawo nga nagsunod sa tawo nga nagsakripisyo. Wala ibulag ni Don Esteban ang iyang mga mata sa panon, ug sa paghitungod sa tawo nga nagpas-an og usa ka dakong krus, nahiumod kini sa yuta ug gipanagkataw-an niadtong nanagbitbit og latigo. Diha gayod kini mahiumod tungod sa gitamboan ni Don Esteban. Buot unta siya manaog aron tabangon ang tawo nga nagkamuritsing sa dugo apan nahitiurok lamang siya ug wala makalihok kay ang tawo nga nahiumod gidunganan paglatigo sa wala’y kukaluoy niadtong mga tawong nagsunod nga nagdala og latigo.

Mibangon ang tawo nga maluyahon na kaayo. Ug sa dihang nakatindog na ang tawo nga nagpas-an sa dakong krus, nailhan ni Don Esteban nga si Berto diay nga iyang anak. Diriyot siya makaambak sa bentana aron pagluwas sa iyang anak. Apan mora’g dihay malig-ong kamot nga mipugong kaniya ug dihay tingog nga mihunghong sa iyang dunggan nga nag-ingon:

“Ayaw! Pasagdi siya kay tahas kana niya nga magsakripisyo siya atol ning panahon aron malukat niya pinaagi sa sakripisyo ang mga daotang buhat nga iyang nangahimo niining kalibotana.”

Mikuyog na lang si Don Esteban sa panon sa mga tawo. Ug sa dihang gilansang na si Berto sa krus mituaw kini sa pag-ingon: “Amahan ko sa Imong mga kamot itugyan ko ang akong kalag.” (Katapusan)