Ulahi na ang pagbasol - Gula 4
Gibati g’yud og kaluoy si Randy ngadto ni Gelyn. Dihang nakabiya na ang duha ka polis nga kauban ni Randy aron patambalan sa Cebu City Medical Center ang bun-og ni Gelyn, mibalik si Randy sa giprisohan ni David. Wala na kadto’ng duha ka mamaligyaay og balut nga diha sa pultahan kaganina dihang gitulisok sa hubog nga si David ang polis. Nakita ni Randy nga nagyaka sa sawog nga semento sa prisohan ang hubog nga bana ni Gelyn apan mikalit kini pagtindog pagkakita niya sa polis.
“Asa na kadto’ng wala’y uwaw nako nga puyo-puyo nga gika-estorya nimo ganina?†isog kaayo og sinultihan si David. Karon nasuta ni Randy nga may pagkamalditohon g’yud diay kining tawhana.
Gimaymayan ni Randy si David nga dili maayo nga dagmalan niya ang iyang kapuyo. Labaw na nga dili maayo nga dili ihatag ang kinitaan ngadto sa asawa ug hutdon lang sa paggasto uban sa mga barkada.
Apan misiga ang mga mata ni David nga daw nasuko. “Mahilabtanon ka kaayo bai. Unsa ka man, polis ka ba?†masuk-anon nga gikawhat niini ang kamot ni Randy nga migunit sa rehas sa bilanggoan. Abtik nga nagunitan ni Randy ang kamot ni David ug iya dayon kini nga gipaud sa puthaw nga rehas. Mitiyabaw sa kasakit si David. Gituyo ni Randy nga pasakitan si David aron mahuwasan kini sa iyang kahubog.
Gipanid-an ni Randy ang panagway ni David. Nagpamahit kini sa kaugalingon niya nga mga ngabil ug nasabot niya nga gitinguha niini nga maantus ang kasakit. Misuway unta kini sa paggamit sa usa niya ka kamot aron iya usab nga magunitan ang kamot ni Randy.
Apan abtik si Randy nga mipaud pag-ayo sa bukton ni David sa puthaw. Misinggit pag-ayo sa David sa tumang kasakit. Nahuwasan kini sa kahubog. Kun tuyoon ni Randy nga balion ang bukton sa kapuyo ni Gelyn, iya g’yud kini nga mahimo sa tumang kasayon. Mikagut sa kalagot ang bag-ang ni Randy ug naghuna-huna nga iyang ipanimalos ang gidangatan ni Gelyn sa mga kamot sa iyang kapuyo. “Nahuwasan ka na ba?†pintok ang tingog ni Randy.
“Nganong dia ko sulod sa prisohan? Unsay ako’ng sala? Ayayyyy, sakitt†singgit ni David. Karon nasayod na si Randy nga nahuwasan na ang kapuyo ni Gelyn. Gibuhian ni Randy ang iyang bukton ug mikilisiw kini nga miyaka sa sawog.
Taud-taud, nahibalik ang patrol car nga gisakyan nila ni Gelyn pag-adto sa ospital. Nanaug si Gelyn nga may bendahe ang nawong. – (Sumpayan)
- Latest
