Anaa ang imong inahan, anaa ang imong anak

Misurok ang dugo ni Grace sa tumang kalagot, dihang gipaila sa iyang Tiya Nancy ang usa ka babaye, nga matud pa, iyang matuod nga inahan. Mitambong kini sa iyang paggradwar sa kolehiyo sa kursong Accountancy.

“Day Grace, siya si Liza, ang matuod mong inahan ...!” matud sa iyang Tiya Nancy, nga sukad makamatngon ug buot si Grace, mao nay nag-amuma ug nagpadako kaniya ug giisip niyang matuod nga inahan.

“Congratulations sa imong paggradwar, anak!” nagpahiyom si Liza nga mitunol sa iyang tuong kamot aron molamano kang Grace. Apan wala kini dawata sa dalaga.

“Karon nga 21 anyos na ko, karon pa ka nagpaila nako? Wa ko’y inahan nga mubo’g-lupad...! malaguton nga tubag ni Grace. Dugay na man gud siyang gisultihan ni Tiya Nancy nga usa ka babayeng nagbaligya sa iyang unod ang iyang inahan. Apan hilom siyang nagbaton og kasilag niini nga wa gyud magpakabana kaniya, wa magpakita niya ug gipasagdan ang iyang iyaan nga maoy migalam ug miamuma kaniya, maoy mipatungha kaniya gikan pa sa elementarya, hayskol ug kolehiyo. Ang iyang Tiya Nancy usa ka gulang dalaga nga sa edad nga 50 anyos, nanag-iya og painitan sa may Carbon Market nga maoy gisaligan niining panginabuhian. Gusto gani unta ni Grace nga Mama ang iyang sangpit kang Tiya Nancy, apan dili kini mosugot sa katarungan nga dili siya ang matuod nga inahan ni Grace.

“Sagdi lang, Grace, kun dili ka moila nako nga imong inahan! Igo na kanako nga makita ka ug makalampos na sa kolehiyo...!”

Paglabay sa usa ka bulan, nakasulod og trabaho si Grace sa usa ka banko ug naghinayhinay sab og review alang sa board exam sa pagka-CPA. Sa pag-abot sa kasaulogan sa Mahal Nga Adlaw, may masulob-ong gipahibalo kaniya si Tiya Nancy.

“Patay na ang matuod mong inahan, Day Grace. Gihaya si Liza karon sa St. Peter Funeral Homes. Ug kinahanglan nga tug-anan na gayud tika sa tanan....!”

“B-bahin sa unsa, Tiya....?”

“Gikan pa sa sinugdanan, sa elementarya, hayskol ug kolehiyo, si Liza maoy nag-abaga sa tanang galastohan. Hilom siyang mohatag nako sa tanan mong galastohan nga wa niya ipasaba nimo. Bisan tuod siya naglunang sa prostitusyon, apan hataas siya’g panglantaw sa masanag mong ugma. Dili tawon ko maka-afford paggasto nimo sa kolehiyo, uy! Abi nimo, siya usab ang naggasto sa pag-review nimo sa Accountancy karon. May sakit sa kanser sa matris si Liza nga stage four na. Gitagalan na sa doktor ang iyang kinabuhi! Kagahapon lang namatay ang matuod mong inahan. Gani, aniay bankbook nga iyang gibilin nako para nimo, sa dayon niyang kamatay. Imong ngalan kining maong bank book....!”

Gidawat ni Grace ang bankbook nga iyang ngalan ang nakasulat. Giukban ug gipasiklapan ang sulod. Six digits nga kantidad!

Nakahilak si Grace. Nauyog ang iyang abaga sa pagbakho. Gihangyo niya si Tiya Nancy nga moduaw sila sa haya sa matuod niyang inahan. Bisan ulahi na, mangayo siya’g pasaylo sa patay na niyang inahan! (Kataposan)