Ulahi na ang pagbasol - Gula 3

Diha’ng didto na sulod sa prisohan ang kapuyo ni Gelyn, gipadayon ni Randy ang pagsukit-sukit kang Gelyn aron matibuok niya ang sugilanon ug ikatala na niya sa police blotter ang hitabo nga pagbun-og kaniya sa iyang kapuyo.

“Sige pagtumo-tumo g’yud diha Gelyn! Makagawas gani ko diri patyon g’yud tika,” misinggaak ang tingog ni David nga naggunit sa rehas nga puthaw sa prisohan nga gipahimutangan kaniya.

Misamot pagtiyabaw si Gelyn nga nakadungog sa bahad ni David. Nakita ni Randy nga nangurog na si Gelyn sa kahadlok samtang mata’g karon ug unya magpanglingi kini sa giprisohan sa iyang kapuyo. Mitindog si Randy ug miadto sa detention cell nga nahimutangan sa gipriso nga kapuyo ni Gelyn. Gibadlong kini sa polis nga dili hadlokon ang iyang kapuyo, apan mora’g wala gayud sa maayo nga pamuot ang mao’ng tawo.

Gitulisok pa niini ang polis ug giingnan nga dili tagdon ang reklamo sa iyang asawa. Nagpangagot ang ngipon ni Randy tungod sa kalagot apan wala siya’y mahimo kay duna nay mga tawo nga nakita niya nga nagli-li sa pultahan sa police station.

Mga kauban diay kini sa drayber sa traysikad nga gisakyan ni David nga miapas sa ilang kauban. “Ayaw’g hinubogi ang polis uy! Mahinaykan ka gani magbasol ka lang,” matud sa usa ka drayber og traysikad.

Mibiya na lang si Randy gikan sa detention cell. Mibalik siya sa nahimutangan ni Gelyn nga walay hunong sa paghilak. Nakita ni Randy nga miburot na pag-ayo ang mora’g naigo sa kinumo sa wala nga kilay sa babaye.

Gisugo ni Randy ang duha niya ka kauban nga ipadala sa Cebu City Medical Center (CCMC) ang babaye. “Ayaw lang sir kay wala man ‘sab ko’y ikapalit og tambal kun resitahan sa doktor,” ni Gelyn pa nga miduko.

Tungod sa kaluoy, mikuot si Randy sa iyang pitaka og gikuha ang tibuok usa ka libo ka pesos dayong tunol niini kang Gelyn. “Dawata Lyn, maayo na lang kini nga imong magamit sa pagpalit og tambal.”

Kadawaton-dili si Gelyn sa gitunol nga kwarta kaniya. Ang tinuod, tagsa ra kaayo siya makagunit niining mao nga gidak-on sa salapi kay ang iyang kapuyo mohatag ra man usahay og P500 ngadto sa P600 ang semana.

“Sige lakaw na mo aron matambalan dayon ang mga bun-og niining babaye. Ayaw siya’g biyai ha, dad-a siya pagbalik dinhi sa police station,” ni Randy pa nga mimando sa iyang mga kaubang polis.  (Sumpayan)