Ulahi na ang pagbasol

Gula 2

Wala’y nahimo si Gelyn gawas sa pagtiyabaw samtang gidabo-dabohan, gitamparos, gisukmag ug gisikaran sa hubog niya nga kapuyo nga si David. Wala na siya makaantos mao nga nagdali si Gelyn sa pagdagan gawas sa kwarto nga ilang giabangan sa Guadalupe.

Midali siya pagsakay og traysikad aron dili maabtan sa iyang bana nga misuway pa sa paggukod kaniya. Dihang nakasakay na si Gelyn sa traysikad, gilingi niya ang iyang kapuyo nga kaganina nalantawan niya nga nagdagan. Mibalik na kini pagsulod sa ilang giabangan nga lawak.

Naluoy ang drayber sa traysikad kay wala na’y nagbiyahe nga PUJ nga kasakyan ni Gelyn paingon sa Guadalupe police station. “Ihatud na lang tika sa police station day, tabangi ko pagpasabot sa polis ha kay basin og imbargohon nila ang akong traysikad,” matud sa drayber.

Naghilak si Gelyn nga misaysay ngadto ni Randy nga dili kay kini ra ang una nga higayon nga siya gikulata sa iyang kapuyo. Wala’y nasuwat si Randy sa iyang notes ug igo lang siya nga gapatuyok-tuyok sa ballpen diha sa iyang kamot samtang naminaw.

Gisabot niya pag-ayo ang mga panghitabo nga naglimin sa kasakit ni Gelyn sa mga kamot sa iyang kapuyo. Gihuwat ni Randy nga molurang na ang kaguol ni Gelyn mao nga gipasagdan ra niya kini nga naghilak.

Taud-taud, may mihunong nga traysikad atubangan sa police station. Nanaug ang usa ka lalaki nga nagwandog-wandog paglakaw. “Imong plete bay!” gisinggitan sa drayber sa traysikad ang tawo apan wala kini mohunong ug mideritso pagsulod sa police station.

Napalingi si Gelyn ug napasiga ang mga mata. “Mao kana si David sir nga akong kapuyo!” manghod sa singgit ang tingog ni Gelyn nga klaro kaayo nga nahadlok. Mideritso pagduol si David kang Gelyn ug iya kini nga gikwelyohan.

Abtik kaayo nga nakatindog si Randy ug gigunitan ang kamot sa hubog nga kapuyo ni Gelyn. “Ayaw’g buhata ang pagdagmal sa imong kapuyo atubangan sa usa ka polis aron dili ko ikaw ipaslak sa bilanggoan!” pintok kaayo ang tingog ni Randy.

“Apan nganong report report man ni siya ninyo? Family matters ni nga away!” nagkanguhal ang sinultihan ni David nga mihana na usab unta sa paggunit kang Gelyn. Gitukmod si David sa polis ug napayaka.

Walay nahimo si Randy gawas sa pagsulod sa kapuyo ni Gelyn sa prisohan aron dili makahimo og kasamok. “Diha ka usa, unya ka na makagawas kun mahuwasan na,” ni Randy pa. (Sumpayan)