Isla Paraiso

Gula 142

Karon may laing ideya nga gisugyot ang hunahuna ni Rey. Kuhaon niya ang pagtagad sa mga kaaway pinaagi sa usa ka hata. Dihadiha mihana siya pagsulod sa pultahan. Ug sama sa iyang gipaabot, gipusil siya sa kaaway nga nag-atang nang daan sa iyang pagsulod. Apan abtik si Rey.

Dihadiha nag-inartista siya nga naigo kunohay sa pagpusil ug nahapaatras sa gawas sa pultahan apan gibilin niya ang armalite nga wala nay mga bala nga iyang gibuhian pagtuyo dapit sa sulod sa pultahan aron kini makakita sa kaaway. Naghayang sa salog, si Rey nangandam sa iyang kaugalingon. Gihugtan niya paggunit ang iyang Uzi.

Unya nakadungog siya’g mga tunob gikan sa sulod sa lawak nga nagpaingon sa pultahan. Nahimuot si Rey sa hilom nga misalir ang iyang kalaki. Nagtuo gayod ang kaaway nga naigo siya ilabi na nga gibuhian niya ang armalite nga iyang gibitbit kaganina.

Maoy nasugat sa mga mata ni Rey ang bayhon sa kaaway nga armado nga nagbarog tungod sa pultahan. Gisirakan niini ang armalite nga naghigda sa salog ug daw sa gipangita siya niini. Pagkakita niini kaniya nga naghayang sa salog simpig sa bungbong, mogamit na unta kini sa armas aron pagpusil kaniya. Apan si Rey nga kaganina rang nakapangandam nakauna sa pagkablit. Naigo ang kaaway sa nagkalainlaing bahin sa lawas niini. Ingon kini sa misayaw sa matag kaigo sa mga bala sa Uzi hangtod nga nabuhian ang armalite nga gigunitan niini. -- Sumpayan pa