Duha ka tiguwang mangtas nagkombati sa tulay

Motuo ka’g dili (Matag Domingo)

Dinhi sa sityo Butong-Ungol duha ra gyud ka inilang ngilngig sa duwa nga “dama” ug sila mao si Ingko Toning ug si Manong Usong. Apan sukad masukad wala pa gyud kini sila magka-engkuwentro sa maong duwa. Daghan nang mipusta habig kang Ingko Toning ug duna say daghan habig ni Manong Usong. Kini si Ingko Toning dili gyud taga dinhi sa sityo Butong-Ungol kay matud pa taga isla Budyong kuno kini. Nahiabot  kini siya dinhi dihang naminyo kini kang Tolyang nga taga dinhi sa sityo.

Ug kay biyudo na man si Ingko Toning maong wala na pud kini mobalik sa isla. Si Manong Usong dili pud taga dinhi sa sityo Butong-Ungol kay taga isla kini siya -- sa isla Pako-Banog ang gidungog-dungog nga dunay daghang ungo ug ang mga tawo kuno dinhing islaha daghan kaayo’g binuhing mga sigbin nga anha lang magduwa-duwa sa puting bunbon sa baybayon sa takdol ang buwan. Ug ning pagdinumtanay sa duha ka tiguwang nga mga maayong laki sa duwa nga “dama” miabot ra gyud ang adlaw sa ilang pagdawat sa gusto sa mga lumolupyo nga mag-away sila sa duwa sa “dama”. Si Bentong nga manunupi maoy nakaagni sa duruha kay inig patupi nila sa barbershop ni Bentong painiton man dayon ni Bentong si Ingko Toning ug ingon man si Manong Usong. Tuod, mora’g dunay tigbakay ang nahitabo karon sa tindahan ni Melong-Sabel kay nia na man sila si Ingko Toning ug Manong Usong nga andam na sa tagsatagsa nila ka abilidad sa duwa sa “dama”. Nagsugod na ang duruha ug matag usa nagbaton og kaigmat. Si Ingko Toning ang unang nakan-an ug wala dangti’g dugay si Manong Usong na pud ang nakan-an ug hangtod nga pugong na lang gyud ang duruha. Apan misawop na lang ang adlaw apan wala pa gyu’y nangapildi sa duha. Ug unya kalit lang mitindog si Ingko Toning aron mopauli na. “Adto na ko, dugay kaayo kang moirog sa bato,” ni Ingko Toning misugod na paglakaw.

“Hoy, imo ba kong giinsulto?” siga kaayo’g mga mata si Manong Usong.

“Pildi ka na nako, kay dugay kaayo kang nakalihok sa imong bato,” ni Ingko Toning pa nga didto na sa layo ug tumatabok na sa tulay nga kahoy. Apan giagpas siya ni Manong Usong nga nasuko.

“Hambugero ka, ha, unsay pildi, ikaw maoy napildi, pasangil ka lang og lakawlakaw aron makalikay,” ni Manong Usong pa nga mikupot sa kuwelyo ni Ingko Toning. Ug nahitabo gyud ang kombati. Kusgan ang duruha ug nakita sa mga silingan nga dili na gyud kapugngan ang kombati. Gikan sa gabii ug midangat kini’g kaadlawon ang binugnoay. Pagka-buntag wala na ang duruha ka tiguwang nga mga mangtas. Wala na pud sa ilang tagsatagsa ka pinuy-anan. Hain kaha ang duha ka tiguwang nga mga maayong laki sa duwa nga “dama” nga kalit man lang sila nga nangahanaw? (Kataposan)