Grabe’ng pagmahay - Gula 7

Luya kaayo ang pamati ni Jasmin pagmata niya pagkabuntag. Tungod tingali kay wala siya maanad pag-inum og beer apan labaw sa tanan, sa grabe nga pagparayganay nila ni Hanz kagabii. Miestar pa sila si Hanz og tulo ka adlaw sa hotel usa mamalik sa Borbon. Sa wala pa milarga si Hanz balik sa gawas sa nasud, gibinlan niya’g dako nga kantidad si Jasmin ug giingnan nga magpatukod kini og bag-ong balay sa iya’ng mga ginikanan. Gisaaran si Jasmin nga hikayon niya ang papeles aron makaapas kini kang Hanz.

Gikuha ni Hanz gikan sa iyang maleta ang gamay’ng karton nga may sulod nga bag-ong selpon. Tan-aw ni Jasmin, pipila pa lang ang nakaangkon niini nga selpon dinhi sa nasud. Charge kang Hanz ang tanang bayranan sa selpon.

Haw-ang ang pamati ni Jasmin nga milarga na ang iyang bana. Milabay ang mga semana ug buwan. “Miasenso na g’yud ta og gamay karon day nga naminyo ka ni Hanz. Pagtinarong g’yud tawon aron dili ta mabalik sa kapobre,” matud sa inahan.

Takulahaw lang nabuang si Jasmin sa barkada. Usahay, gabii na kaayo siya nga mahiuli gikan sa diskohan. Misamot dihang gipalitan siya’g sakyanan ni Hanz nga gipakuha ra sa distributor sa Lahug. Usa ka adlaw, nakahuna-huna si Jasmin nga i-search niya ang ngalan sa iyang bana sa Google.

Migawas ang website sa dakung kompaniya sa New York. Dili makatoo si Jasmin pagkakita nga ang iyang bana nga si Hanz usa sa mga senior manager. Wala niya sukmati si Hanz nga wala motug-an kaniya. Kun mangayo si Jasmin og dako’ng kantidad padad-an dayon siya.

Nausab na ang kinabuhi ni Jasmin. Gikan sa pagka kabus, karon kwartahan na. Misamot ang iyang kamahiligon sa suroy-suroy. Wala malilong nga minyo na si Jasmin apan duna g’yuy mga tentasyon.

Daghan ang nanguyab kaniya. Hangtod nga natintal si Jasmin kay nahuna-huna niya nga dili man masayod si Hanz sa iyang gibuhat. Usahay makadawat si Jasmin og text messages gikan ni Hanz nga daw nagmahay.

Panagsa na lang kini motawag kaniya. Nahibulong si Jasmin nga nasabtan niya nga mora’g nabugnaw si Hanz kaniya. Hangtud nga gitawgan siya ni Hanz ug gimahayan ngano’ng nakaako siya sa pagbudhi sa ilang kaminyoon.

Milimod si Jasmin apan nakurat siya nga gilitok ni Hanz ang ngalan sa iyang boyfriend. Walay kasayoran si Jasmin nga ang tanan niya’ng kumunikasyon gikan sa iyang selpon, madawat usab ni Hanz ug mipahubad niini sa mga Filipino translator. – (Kataposan)