Isla Paraiso - Gula 140

Midali si Rey pagbangon ug gipunit ang armalite sa kaaway nga dili pa lamang dugay iyang gipusil. Unya midagan siya paingon sa unahan. Ang iyang tuong kamot maoy nagbitbit sa armalite samtang ang walang kamot maoy naggunit sa Uzi. Nagkalingaw siya’g pabuto samtang nagdagan aron wala’y kaaway nga makahigayon sa pagpusil kaniya. Wala siya’y gitumong sa iyang pagpusil.

Hangtod nga nahiabot siya sa bahin sa ikaduhang andana sa bodega nga may mga dagkong lawak. Abiyerto ang mga pultahan sa maong mga lawak. Wala siya mokompiyansa kay tingali’g may mga kaaway nga naghupo sa sulod niini. Mihunong siya pagdagan ug miipli sa usa ka steel cabinet nga mao ray bugtong butang nga iyang nakita sa gawas sa mga lawak niadtong dapita.

Naniid siya sa palibot. Nadungog niya nga nagpadayon pa sa pagpinusilay ang iyang mga kaubang polis ug ang mga tulisan nga ilang kaaway. Buot siyang makaabot sa dapit diin nahitabo ang pinusilay apan unahon una niya’g tino kun wala bay mga kaaway nga naglublob sa mga lawak nga iyang nahitukmaan.

Nanukad sa steel cabinet nga iyang gipasalipdan, gikablit ni Rey ang armalite nga iyang gigunitan. Maoy iyang gipunting ang nagtingabngab nga pultahan sa usa ka lawak nga maoy labing duol sa iyang nahimutangan. Samtang nagpabuto, midali siya pagdangop ngadto sa bungbong duol sa pultahan sa lawak. -- Sumpayan pa