Grabe’ng pagmahay

Gula 5

Wala makapugong ang British nga si Hanz sa iyang kalipay nga nagkita na gayud sila si Jasmin. Gigakus niya ang iyang Filipina nga girlfriend ug gitutokan sila sa mga tawo didto sa airport. Mora’g nabakikaw kaayo si Jasmin nga gigakus siya sa foreigner kay ang tinuod wala pa gani g’yud siya makasuway nga adunay lalaki nga migakus kaniya gawas sa iyang amahan. Wala makasabot si Jasmin sa iyang gibati apan gipasagdan ra niya si Hanz nga migakus kaniya.

“Okay, let’s go,” matud sa British human nga miduol na kanila ang usa ka tawo nga miguroy sa daku nga maleta ug may gikabiba usab nga bag. “He is my buddy, his name is George,” paila ni Hanz sa kauban nga mipahiyom. Giduol sila sa usa ka babaye. Nagpaila ang babaye nga kawani sa rent-a-car company. Gigiyahan sila sa nagpaabot na nga van nga maoy ilang sakyan paingon sa dapit nila ni Jasmin sa Borbon.

“I know that Borbon town is 70 kilometers away from Mactan airport that’s why I arranged a rent-a-car company to provide us a transportation in going to your place,” giingnan ni Hanz ang iyang girlfriend.

Nasayran ni Jasmin nga gi-research diay ni Hanz ang gilay-on sa Borbon gikan sa Mactan mao nga mi-arrange siya daan og kasakyan. Samtang nagtupad sila paglingkod si Hanz ug Jasmin, nagkalingaw usab og sultihanay si Grace ug ang kauban ni Hanz.

“Basin magkasabot mo diha day ha?” nagngisi si Jasmin nga nangomedya sa iyang amiga nga si Grace. Matud ni Hanz nga gusto g’yud dayon siya nga mahikay sa labi’ng dali nga panahon ang ilang kasal ni Jasmin.

Gipasabot ni Hanz nga wala na lang moanhi pa ang iyang mga ginikanan kay sa ilang nasud mahimo ra nga magbuot-buot pagpakasal ang usa ka anak kun hingkud na sa pangedaron. Apan matud ni Hanz nga wala’y pagsupak ang iyang ginikanan nga si Jasmin ang iyang minyoan.

Kilum-kilom na sila nga miabot sa Borbon. Sanglit daplin man sa karsada ang balay nila ni Jasmin, wala maglisud ang van sa pagpangita og kaparkingan. Gidiskarga sa drayber ang daghang mga kargamento nga gikan sa abyon, direkta na nga gikarga sa sakyanan.

Sari-sari lang ang gidala sa British nga si Hanz. Gikan sa pagkaon, sinena ug ubang mga butang nga sinugatan   ni Jasmin, sa iyang mga ginikanan ug igsoon. Naikog kaayo ang mga ginikanan ni Jasmin kay nasuta nila nga dato g’yud diay si Hanz.

“Don’t worry sweetheart I can manage myself,” giingnan si Jasmin sa iyang boyfriend kay nakasabot kini nga naproblema sila kun asa mohigda. – (Sumpayan)