Isla Paraiso

Gula 138

Wala ihinayon ni Rey ang ideya nga gisugyot sa iyang hunahuna. Milakdop sa iyang kahimungawong nga tingali’g mameligro hinuon siya kun iya kining buhaton. Tingali’g mibalhin na’g puwesto ang kaaway nga iyang gipanid-an ug makit-an siya niini kun mogawas siya sa iyang gitagoan.

Niadtong tungora, nagpadayon ang pinusilay didto sa luyong bahin sa bodega. Misantop sa hunahuna ni Rey nga gika-engkuwentro sa iyang mga kauban ang labing daghang mga tulisan. Buot siyang makaayuda sa iyang mga kauban.

Apan sa dili pa siya mopadayon ngadto sa dapit nga gigikanan sa mga buto, kinahanglang iyang maluthang kining kaaway nga nagtago sa luyo sa kahon. Dili kini niya hatagan og higayon nga makaikyas. Ang kinabuhi niining maong tulisan dili pa igong ibayad sa kinabuhi sa iyang kaubang polis nga nakalas niining ilang pagsulong karon sa hide out sa mga bandido.

Didto sa gawas nagkataas ang gintang sa pagsubang sa pikas nga bulan. Misamot na ang kadam-ag sa gawas ug ang sulod sa bodega nakaambit na’g maayo sa kahayag sa gawas. Maila na pag-ayo ang bulto sa bayhon sa usa ka tawo nga maglihok sulod sa bodega. Ang mga mata ni Rey miungot pag-ayo sa kahon nga gitagoan sa kaaway nga buot niyang pugniton.

Kusog nga naglihok ang kaisipan ni SPO3 Rey Corpuz niadtong higayona. May ideya nga takulahaw lang misantop sa iyang hunahuna. -- Sumpayan pa