Grabe’ng pagmahay - Gula 4

Nakumbinsir g’yud si Jasmin sa iyang higala nga si Grace ug sa iya mismo nga amahan nga pakaslan ang British nga si Hanz nga gusto’ng makigminyo kaniya.

Nianang pagka hapon, mikontak sa selpon ni Jasmin ang British niya nga boyfriend. Misukna kini kang Jasmin kun nakahukom na ba ang dalaga sa pagdawat sa iyang tanyag nga sila magminyo      na.

Pwerte’ng lipaya sa foreigner nga miuyon na si Jasmin nga magminyo na sila. Giingnan si Jasmin ni Hanz nga molarga dayon siya paingon sa Pilipinas aron hikayon ang papeles alang sa ilang kaminyoon.

Nagsagol ang gibati ni Jasmin. Gibati siya’g kakulba nga masulod na siya sa kinabuhi’ng minyo apan malipay usab siya kay nagtoo siya nga pinaagi niini mahaw-as sila sa kalisod ug ang iyang pamilya.

Dihang gitug-anan ni Jasmin si Hanz nga kabus kaayo ang ilang pamilya ug nabuhi lang sa pagpanguma sa lungsod sa Tabuelan, gisaaran siya ni Hanz nga tabangan ang iyang mga ginikanan.

Milabay ang mga adlaw. Mitawag ni Jasmin si Hanz nga nagpahibalo nga miabot na siya sa Manila. Gikulbaan kaayo si Jasmin nga ikakita na niya ang British nga gusto’ng makigminyo kaniya.

Nag-ilis si Jasmin aron mosakay og bus sa tumong nga masugat niya si Hanz sa pag-abot niini sa Mactan Airport. Alas singko sa hapon ang gikatakda nga arrival sa flight ni Hanz.  Miuban kaniya ang higala niya nga si Grace.

Naglibog ang mga ginikanan ni Jasmin kun asa nila pahigdaa ang ilang bisita nga foreigner nga gamay man kaayo ang ilang balay nga hinimo lang gani sa ginabas nga lubi ug sawog-kawayan.

Lapas alas kwatro sa hapon, didto na si Jasmin ug Grace sa airport. Nagpaabot sila sa pag-abot sa plane nga gisakyan ni Hanz. Gikulbaan si Jasmin kay magkakita na g’yud sila ug ang British.

Taud-taud, nakadungog sila og announcement nga paingon na nga motugpa ang flight 306 nga gikan sa Manila. “Naunhan g’yud ko nimo day. Ako hinoon nga dugay na nga nag-chat wala g’yud makakita og foreigner nga gusto’ng makigminyo nako,” matud ni Grace.

Nanindog na ang mga tawo nga didto nagpahimutang sa arrival area. Didto kini nag-atang sa gawasanan nga bahin sa mga pasahero. Gisuwayan og kontak ni Jasmin ang phone ni Hanz.

“Hi! I’m already here at Mactan airport,” matud sa British. Nalantawan ni Jasmin ang tawo nga naggunit og selpon nga adunay gika-estorya. Wala gayud siya masayop, si Hanz ang iyang nakita.

“Hanz! I’m here!” singgit ni Jasmin dungan sa pagwara-wara sa tuo niya’ng kamot. Nakit-an na siya ni Hanz nga nagpahiyom.  (Sumpayan)