Ning adlaw nga mograduwar ka unta

Nakurat si Mrs. Tekla Lagunsay samtang nagtan-aw sa list of graduating students nga mopaso karong adlawa. Wala gyud maapil ang ngalan ni Norbing, iyang pinanggang anak.  Maayo pa ang anak sa iyang katabang kay makagraduwar pa. Magna Cum Laude pa gyud! Samtang ang iyaha, bayaaa???

Mikiring ang ilang telepono. Dali niyang gibutang ang kopya nga iyang gunitan sa lamesa ug gipunit ang awditibo nga diha ra sa iyang duol. “Hello, Lagunsay residence, good morning!”

“Ma’am, good morning sab. Sa We Care Hospital ni. Pahibalo lang unta  nga si Norberto Lagunsay, anak ni Mrs. Tekla Lagunsay nia sa emergency room kay napusilan.” Direktang taho sa suking tambalanan, kinsa nakaila kaayo sa kadato sa pamilya nilang Lagunsay.

“Haaa???” Mao ray natubag ni Tekla, kinsa midali dayo’g paingon sa ilang grahe. Wala abtig medya ora, didto na siya sa emergency room. Naabtan niya ang nars ug doktor nga mibendahi sa tuong kamot ni Norbing.

“Uy, Mie, nia diay ka?” Sa anak pa nga mipahiyom ni Tekla. “Buanga, uy! Gitionan ko’g pusil sa karibal namong frat. Ako bitaw’ng alihan sa tuo  kong palad ang sumbohan sa iyang 38 kalibre, lungag lagi akong kamot. Abi ko’g di makabuto ang armas kun alihan. Buto man diay gihapon!”

Lingolingo ray nahimo ni Tekla. Sa tuno sa sinultian sa iyang anak, karon namatud-an na niya unsa ka tinuod ang gibalita ni Iyay nga ilang katabang -- nga si Norbing hagbay dang nagumon sa gidiling drugas samtang siya didto moestar sa Amerika aron mangunay pagdumala sa ilang negosyo.

Karon, mituo na si Tekla sa panultihon: “Kun unsay kadaot nga nahimo mo sa uban, mosumbalik sab kini kanimo.”

Nanumbalay sa alimpatakan ni Tekla ang matang sa negosyo nga iyang giapilan, diin ang kadali ra gayod pangitaon ang ganansiya. Mora’g atabay kini nga kusog ang tinubdan sa tubig. Nagbusagak sa minilyon nga kita: sa peso ug dolyares. Ang nakaporke lang, kay iyaha sa kangitngit ang maong negosyo. Ug dili sa kahayag. Busa, dayag na lang, nga ang puy-ang kinabuhi sa iyang anak, kangitngit sab.

“Mao ni rason nganong mao ni ang gidangatan mo, Norbing, ning adlaw nga mograduwar ka unta. Ako ang hinungdan ning tanan.” Mga tulisok nga misamad sa kasingkasing ni Tekla. Unya, may daklit nga kahayag nga midan-ag sa iyang hunahuna: “Bahala na, biyaan ko na kining daotan kong negosyo.” (Kataposan)