Isla Paraiso - Gula 136

Wala na magpaabot pa si Rey og laing pitik sa gutling. Dihadiha gikablit niya ang gigunitang Uzi samtang wala pa makapabuto ang duha ka kaaway.

Naigo kini sa mga bala gikan sa iyang armas ug hapit magkadungan ang duha pagkahagsa sa salog.

“Sir, misangpit ang polis kang Rey. Midali kini pagduol kaniya. Si Corporal Benturada diay ang maong polis.

“Pag-amping sa imong mga lihok,” gipahimangnoan ni Rey ang Korporal. “Maayong pagkapuwesto ang mga kaaway.”

“Ingon sa nakapangandam sila sa atong pag-abot, Sir,” ni Korporal Benturada pa, “kay nakatago man sila.”

“Posible nga nakabantay sila sa atong pag-abot,” ni Rey pa. “Nakapatay na sila’g usa sa atong kauban.”

“Si Sarhento Ayop kadtong ilang napusilan, Sir,” ni Benturada.

“Magbuwag-buwag kita, Korporal,” ni Rey. “Pangitaon nato ang uban pang mga kaaway.”

“Husto ka, Sir,” ni Benturada pa. “Dili maayong magkuyog ta kay dali ra kitang mamatikdan sa mga kaaway. Maayo ang magtinagsa.”

“Pag-amping lang sa imong kaugalingon,” subling pahimangno ni Rey.

Dihadiha gipalong ni Benturada ang plaslayit nga iyang gigunitan. Apan dili na kaayo ngitngit ang dapit. Niining tungora, mipakita na ang pikas nga Bulan sa udtong kating didto sa gawas ug kini nakatabang paghatag og diyotay’ng kahayag sa sulod sa bodega. -- Sumpayan pa