Ug migradwar si Mar

Mapagarbuhon nga mipaso si Mar ug misaka sa bantawan dihang gitawag na ang iyang ngalan sa emcee nga maestro, isip usa ka malampusong migradwar sa 4th year high school sa pribadong eskuylahan sa ilang baryo nga gipanag-iya sa usa ka adunahang negosyante nga may kolehiyong eskuylahan usab sa ilang lungsod.

 Wala pay publikong eskuylahang hayskol sa ilang baryo niadtong panahona, busa bisan kabos ang iyang Tatay ug Nanay nga nabuhi lang sa gamay’ng parselang uma sa banika ug sa pagpanarbaho sa asyenda sa tubo, monas ginhawa nga naka-eskuyla si Mar, kay bugtong man siyang anak.

Malipayon nga gidawat ni Mar ang iyang diploma ning hapona. Iya kining giisa didto sa bantawan samtang nagpasiklap sa iyang Tatay Binog ug Mama Mayla nga naglingkod sa mga talay nga lingkuran uban sa mga ginikanan nga misaksi sa gipahigayong seremonyas sa gradwasyon sa tanang 4th year high school. Nagpanglingo si Mar nga naghanduraw sa tumang kalisod nga iyang nasinati sa iyang pag-eskuyla gikan pa sa elementarya ug hangtud na sa hayskol.

Matag adlaw, maglakaw lamang si Mar gikan sa ilang balay sa lima ka kilometrong gilay-on sa eskuylahang elementarya ug hayskol sa ilang baryo. Matag Sabado nga way klase ang eskuylahan, nagkugi siya sa pagpanghawob og dahon saging aron ibaligya sa tiyanggihan. Mangahoy siya’g palwa sa lubi aron itumod usab sa suki niyang manindahay og puso nga humay sa tiyanggihan matag Domingo.

Mamayabas usab siya sa ihalas nga mga punoan sa bayabas sa banika aron pabayloan og papel sa iyang mga klasmeyt sa elementarya. Nag-antos siya sa bag nga buli nga sudlanan sa iyang mga notebook ug libro. Duha ka purol ug t-shirt ang iyang pulipulihan pagsul-ob uban sa iyang tsinelas matag semana.

Sa pagkahayskol na ni Mar, aron makaabag sa bayranan sa binulang tuition fees sa iyang Tatay ug Nanay, nanghurnal siya sa asyenda sa tubo matag Sabado sa nagkalainlaing trabaho-panapas sa katubhan, pangguna, pangabuno ug pananom sa mga tubo.

Nag-antos siya sa bawon niyang kan-on nga mais nga sinaksakan og kamoteng kahoy ug kamoteng bagon. Kalagmitan maoy himuon niyang sud-an ang sinugbang lilion nga tawong ug sinugbang uhong kay kutob ra man sa adlaw’ng Miyerkules ang sud-an nga kaling nga makompra sa iyang Nanay Mayla. Duha ka karsones nga ukay-ukay ug laing duha ka puting polo-shirt nga ukay-ukay ang pulipulihan niya’g sul-ob pagkatapos sa katuigan nga giparesan sa sapatos goma nga busloton og kilid.

“Tay, Nay....! Alang kaninyo kining akong diploma nga nadawat karon” mapasigarbuhon si Mar nga mipakita sa nadawat niyang diploma pagkatapos sa seremonyas sa gradwasyon.

“Salamat nga nakagradwar na gyud ka sa hayskol, anak!” nagpahiyom ang iyang Tatay Binog nga milamano kang Mar.

“Bisan sa atong kakabos, nilampos gyud ka, Mar...!” luhaan usab ang mga mata sa iyang Nanay Mayla nga migakos kang Mar.

Nagginaksanay sila si Mar ug ang iyang Tatay Binog ug Nanay Mayla. Alang kang Mar,  andam na usab siya sa pag-atubang sa laing hagit aron makapadayon siya og eskuyla sa kolehiyo. Kay alang kaniya, dili gayud babag ang kakabos sa pagkab-ot og hataas nga edukasyon sa umaabot. (Kataposan)