Grabe’ng pagmahay

Gula 2

 Ang amigo nga langyaw ni Grace nangayo sa e-mail address ni Jasmin. Iya kuno kini nga ihatag ngadto sa higala niya nga British nga gusto’ng makighigala ni Jasmin.

“He is a good guy,” matud sa langyaw’ng ka-chat ni Grace nga nagtumbok sa British national niya nga higala nga gusto’ng makig-chat ni Jasmin. “Swerte ka day kay buotan diay kadtong British national,” ni Grace pa ngadto sa higala.

Wala magdugay pakig-chat si Grace sa iyang higala nga langyaw. Namauli sila si Grace ug Jasmin sa ilang barangay nga nahimutang mga siyam ka kilometro ang gilay-on gikan sa lungsod. Gihatagan ni Jasmin og P2 mil ang iyang amiga.

“Pagka swerte g’yud nimo day uy. Paminaw ko dato g’yud tingali kadtong British nga klaro kaayo nga naibog nimo,” ni Grace pa nga nasina kaayo sa amiga. Gisuginlan ni Jasmin ang iyang mga ginikanan nga nakaamigo siya og British national sa internet ug mihatag kaniya’g kwarta.

Dili makatuo ang amahan ug inahan ni Jasmin nga P20 mil ang gihatag ngadto sa iyang anak sa British national nga nahigala niini sa internet. Pagka-ugma nangompra dayon og pagkaon sila si Jasmin ug ang iyang inahan.

Pag-uli nila sa balay nga nangompra og daghang makaon, didto na si Grace nga nagpaabot kang Jasmin. “Tana day, mangadto ta sa lungsod kay mag-chat na ‘sab ta sa atong foreigners,” matud ni Grace.

Gipaubanan pa og pahiyom sa mga ginikanan ni Jasmin ang dalaga sa dayon’g paglakaw sa ilang anak aron makig-chat sa higala niini nga British. Giswerte si Jasmin kay wala danti og dugay sa pag-sign in niya sa iyang account, diha dayon ang British national niya nga amigo.

Gi-accept dayon ni Jasmin ang invitation sa British ug nag-web cam dayon sila. Hilom kaayo sila nga nagbayloay og mga pulong pinaagi sa chat. Naaninaw na g’yud ni Jasmin nga ambongan ang British national nga si Hanz, apan edaran na lang kun itandi kaniya.

Gipangutana si Jasmin ni Hanz sa iyang contact numbers. Wala magduha-duha si Jasmin pagtug-an nga wala g’yud siya’y cellphone. Giingnan siya sa British nga magpalit og barato nga cellphone kay hatagan ra unya siya niini og mahalon nga cellphone ug tablet nga iyang magamit.

Daw nagyapa-yapa sa kalipay si Jasmin nga gisaaran ni Hanz. Gihatagan si Jasmin og contact numbers sa British national ug misaad nga magpadala dayon kini og kwarta nga ipalit sa dalaga og cellphone.

Nasina pag-ayo si Grace kang Jasmin kay niana gayud nga hapona nakadawat na usab kini og 200 dolyares gikan ni Hanz aron ipalit og cellphone.  (Sumpayan)