Isla Paraiso

Gula 135

Karon nasayod na si Rey kun hain magtago ang mga kaaway. Mipaduol siya ngadto sa dapit nga gigikanan sa mga buto sa pusil sa mga miluthang sa iyang kaubang polis. Wala na lang niya tandoga ang patay’ng lawas sa polis nga napusilan. Nakaseguro siya nga patay na kini tungod sa kadaghan sa mga bala nga miigo sa lawas niini sa pagrapido sa mga kaaway.

Nag-amping si Rey sa iyang mga lihok. Gihait niya ang iyang mga mata taliwala sa kangitngit. Nagmatngon siya nga dili makamugna’g kasikas aron dili siya mamatikdan sa mga kaaway nga hilom niyang gipadul-an.

Pag-abot niya sa laing dakong haligi, mipasalipod siya. Nahiatol usab nga maoy pagtabas sa kahayag sa plaslayit gikan sa hagdanan. Miipli siya’g maayo aron dili matandangan sa siga sa plaslayit sa lain pa niyang kauban nga miagpas kaniya. Karon naghulat siya’g hustong higayon.

Sa iyang pangagpas, ang mga kaaway nga sa iyang banabana nanaghupo dili layo sa iyang nahimutangan mohimo gayod og lakang aron pagpusil sa polis nga nagsingabot sa ikaduhang andana. Hulaton niya ang paggimok sa mga kaaway gikan sa gitagoan niini. Iya kining unhan pagpusil kun makapabor na siya.

Wala masayop si Rey sa iyang pangagpas. Paghimuntog sa iyang kaubang polis sa ikaduhang andana nga nagpangiwa’g sa dala niining plaslayit, duha ka tawo nga armado sa armalite ang kalit migawas sa ilang gitagoan. -- Sumpayan pa