Grabe’ng pagmahay

Anak si Jasmin sa magtiayon nga kabus. Panday lang ang iyang amahan ug manglabada ra panagsa ang iyang inahan aron makaabag sa gamay’ng kita sa iyang bana.

Wala gani  makahuman si Jasmin sa iyang pagtungha sa high school tungod kay dili makasapar sa iyang panginahanglan ang kita sa iyang amahan.

Naikag si Jasmin pagsalmot sa Chat sa internet diin mga langyaw ang target sa iyang mga amiga nga sama kaniya og pangedaron.

Hitsuraan si Jasmin mao nga diha’ng nakita siya sa internet tupad sa iyang amiga, nakakaplag dayon siya og admirer nga British.

Ang British amigo sa langyaw nga ka-chat sa amiga ni Jasmin. Gitabangan si Jasmin sa iyang amiga paghimo og kaugalingon niya nga account sa internet aron kini maoy gamiton sa dalaga pakig-chat sa British national.

Batan-on pa ang British nga bana-bana nila kapin pa lang sa 30 ang pangedaron. Gitug-anan nila ang British sa problema ni Jasmin nga wala’y pangbayad ug pang-internet.

“No problem I will send you money through a forwarder so that we can always communicate to each other,” matud sa British. Mipauli si Jasmin sa ilang balay nga mahinamon. Wala g’yud hinuon siya magtoo nga tinud-on sa langyaw ang giingon nga padad-an siya’g kwarta.

Apan pagkahapon, miadto sa ilang balay ni Jasmin si Grace nga higala niini nga adunay boyfriend nga kanunay niya nga ika-chat. “Mikontak nako ang akong foreigner ug nagpahibalo nga ang British nagpadala na nimo og kwarta. Ipaadto na kuno sa money forwarder,” giingnan ni Grace si Jasmin.

Nagdali sila nga milakaw. Wala na gani makapananghid si Jasmin sa iyang inahan. Human kapirmahi ni Jasmin ang cash slip, gitunol dayon sa cashier sa money forwarder ang kwarta.

Napasiga ang mga mata ni Jasmin kay daghan ang kwarta nga gihatag kaniya. Apil si Grace nakurat sa kadaghan sa kwarta nga gipadala sa British national.

“Ipha day kun pila na,” matud ni Grace. P20 mil ang gipadala sa British. Dili makatuo si Grace ug Jasmin nga ingon niini kadaku ang gipadala sa British.

“Dato diay tingali kadto siya day kay nganong dako man kaayo ang kwarta nga iyang gipadala. Dili pa gani kami chat mate,” matud ni Grace. Miadto dayon sila og Internet Café ug mi-open si Grace sa iyang account. Nagtupad sila si Jasmin ug gitudloan ni Grace ang amiga unsaon ang pag-chat sa internet.

Wala mosipyat kay diha dayon ang amiga ni Grace. Wala hinoon ang British nga nakig-amiga kang Jasmin.  (Sumpayan)