Ang akong diploma

Dili tiaw ang gibati kong kaibog nga naglantaw kang Lea nga mipaso sa bantawan ug midawat sa iyang diploma, timaan nga nakagradwar na gayud siya sa kursong Computer Science. Hinay kong miuliot gikan sa daghang mga tawo nga nanambong sa seremonyas sa gradwasyon sulod sa Cebu Colliseum ug migawas ko aron mopauli sa apartment nga akong giabangan sa pagpuyo ning siyudad. Nakapanglingo ko nga naghunahuna sa kaugalingon.

Managsilingan mi si Lea sa usa ka barangay sa siyudad sa Dipolog ug parehas mi nga ania mag-eskuyla sa kolehiyo dinhi sa siyudad sa Sugbo. Managsamang unibersidad kami nagtungha si Lea. Nagkuha ko’s kursong Accountancy ug si Lea sa Computer Science. Nag-istar si Lea sa balay sa iyang maestra. Maoy pangandoy sa tagsatagsa namo ka mga ginikanan nga makatapos mi sa among mga kurso ug mahimong usa ka propesyonal sa umaabot. Diha na kami si Lea sa 4th year college, dihang nahilig ko sa pagpakig-chat sa internet. Nakaila ko ang usa ka foreigner nga Australyano. Si Mike Howard, 40 anyos ug usa ka negosyanteng ulitawo, nga mianhi gyud sa siyudad sa Sugbo aron makigkita nako, human mi nagkauyab pinaagi sa chat. Nataligam-an ko ang akong pag-eskuyla diha sa kanunay na namong panagdeyt sa nauyab kong Australyano. Gisuroy namo ang mga tourist spot sa Bohol, Palawan ug lahos na sa Boracay. Natugyan ko’s Australyano ang akong kaputli ug mimabdos ko nga way kasayuran ang akong mga ginikanan sa siyudad sa Dipolog. Nahunong ko sa pag-eskuyla nga usa na lang ka semester ang kulang. Sa sulod sa apartment nga akong giabangan, gihitsasan ko sa uyab kong Australyano sa tanang kagamitan ug aplayanses.

“Ayaw bayag saba sa akong papa ug mama, ha, Le, ning akong gidangatan...!” pasidaan ko ni Lea dihang giduaw ko niya sa gi-estaran kong apartment.

“Ako’y bahala, Jinky! Hinuon, swerte man sab ka, kay adunahan man ang uyab mong foreigner ug pakaslan man kaha ka niya! Wow, bongga naman sa kagamitan ang sulod sa apartment mo. Magic sing, karaoke, Led TV, laptop, hunolhunol nga sopa, ref ug kitchen utensils....!”

“Mas nindot man gyud unta to nga makagradwar ko, Le ug makakuha’g diploma...!”

Sa paghiabot nako sa giabangang apartment, maoy misugat kanako si Nang Lily, ang yaya sa lalake kong anak nga maglima pa ka buwan human ihimugso nga liwat kaayo sa foreigner kong uyab.

“Day Jinky nanawag diay sa long distance sa telepono si Mike. Moanhi siya ning semanaha uban sa iyang parents aron hikayon ang bongga ninyong kasal...!”

Igo lang kong nakapahiyom. Bisan nagka-chat na mi si Mike kagabii bahin sa among kasal, nanawag pa gyud diay sa telepono nga bag-o lang usab gipa-estalar nako sa kagustohan ni Mike. Miginhawa ko’g lawom. Bisan wa ko makagradwar, apan wa koy pagmahay. Makasabot ra sab unya sila si papa ug mama. Nasayod ko  nga ang foreigner kong uyab maoy makahatag og masanag kong ugma – nga misaad na nako nga sa iyang pagbalik, palitan ko niya’g house and lot ug bag-ong sakyanan, human sa among kasal. Ug malipayon kong gisud-ong ang anak namo ni Mike nga gikugos ni Nang Lily ang talagsaon kong diploma! (Kataposan)