Isla Paraiso

Ang kamingaw sa kagabhion nga mihugpa sa maong dapit kalit gipulihan sa daw impiyerno sa nagkayokayong mga bala sa mga armas.

Pagkamatikod ni Rey nga mi-atake na ang iyang mga kauban, milihok dayon siya. Gipangita niya ang agianan sa ikaduhang andana sa bodega diin didto maggikan ang mga buto. Nagdagan siya nga sa matag karon ug unya magpanghangad ngadto sa ibabaw bisan sa kangitngit.

Kalit mitang-on ang butobuto sa iyang paghimuntog sa tiilan sa hagdanan paingon ngadto sa ikaduhang andana. Daklit siyang milingi ngadto sa iyang luyo ug iyang nakita ang iyang mga kauban nga mi-back up kaniya. Gipasiga nila ang ilang mga plaslayit.

Mihinay si Rey pagtikang sa hagdanan nga semento. Sa matag karon ug unya mohunong siya aron pagpaniid sa kinasikas didto sa taas. Mohangad siya unya mopadayon sa pagtikang sa mga ang-ang sa hagdanan sa higayon nga iyang masuta nga wala’y kuyaw ang iyang kahimtang.

Nagkatagkatag ang mga sakop ni Rey. Ang uban mipaingon sa luyong bahin sa bodega. May pipila nga misunod kaniya.

Paghimuntog niya sa taas, miliraw gilayon ang mga mata ni Rey. Ug mao dayo’y naaninag sa iyang mga mata ang butho sa bayhon sa usa ka tawo nga nagbitbit og armalite. -- Sumpayan pa