Aktibista nga abogado

Maihap na man lang ang mga huwes nga wa nasuko nimo. Baniog  na man kaayo sa mga abogadong nakaila nimo, nga aktibista kuno ka nga pagkaabogado! Ngano man, bay?” ni Eman Chavez, ngadto ni Atty. Kenneth Tan, bestfriend ug classmate sa law school sa nauna. Ning sayong kahaponon, naghinabi ang managhigala sulod sa karenderya atbang sa Palace of Justice sa dakbayan. Mga napulo ka tuig na nga nagpraktis sa law profession si Kenneth.

Si Eman wa naabogado kay na busy na sa iyang pagkapangulo sa RTC Social Workers. “Unsaon man bay. Nga maihap na man lang sab ang mga huwes nga kamao sa ilang trabaho. Kay bisa’g simple kaayo imong kaso, way oppositor, way contrary evidence batok sa imong kliyente, pildi man lang gihapon ka,” ni Kenneth. “Unsa may nabuhat nimo nga gikontrahan ka man sa ubang mga huwes?” ni Eman. Nabalaka sa kahimtang sa higala. Basi’g ipa-disbar sa ubang huwes.

“Ginawong nako sila sa Constitution. Centennial Prayer ug Vision of the judiciary. Ako silang gipahinumduman nga the office of the judge is a public office. As a public office, the public officer is a public servant. All public servants should be pro people. Not anti people,” ni Kenneth. “Well, igo man sab ko ana, bay,” ni Eman.

“Igo ka kun dili ka tarong sa imong opisina. Apan nasayod kong pro people ka,” ni Kenneth. “Wa man diay dautan sa imong gibuhat” ni Eman. “Ilang panabot ang dautan. Giinsulto kono nako sila. Insulto ba nang pahinumduman ka’s katarong?Dapat gani, magtuon ang mga huwes sa Bibliya, sa pulong sa Diyos,” ni Kenneth. “Sobra na sab na,” ni Eman. “Ang Supreme Court mismo nigamit og proverbs gikan sa Bible,” ni Kenneth. “Yati ra. Diin mang kasoha?” ni Eman. “Sa usa ka kaso, diin nilayas ang akusado, niingon ang Supreme Court, flight is evidence of guilt. Because according to the proverbs, the guilty fleeth when no man pursueth, but the innocent is as bold as a lion,” ni Kenneth.

“Nganong patun-on man nimo ang mga huwes sa Bibliya?” ni Eman. “Tungod kay naa diha ang pulong sa Diyos. Unya ang preamble sa atong Constitution nag-invoke og “aid of the Almighty God.” Nagpatabang ta sa Diyos. Atong Centennial Prayer nag-ingon nga Almighty God is our Supreme Judge. Ang Vision sa judiciary, nag-ingon nga gusto ang Judiciary og cost effective legal services. Dapat ang mga huwes, dunay konsensiya.

Dili subra ka legalista nga nahanaw na ang common sense” ni Kenneth. “Imo ra na ha?” ni Eman. Ug nahilom sila. Kay niabot ang ilang gi-order nga binignit. Gihatud sa silbedora ug niduko na lang sila’g kaon. (Kataposan)