Wala’y suwerte nga kahigayonan

Sa milabay nga tuig, migraduwar si Helen sa high school sa ilang barangay. Nalipay ang iyang mga ginikanan apan ang problema karon mao ang pagpadayon sa kolehiyo. Kabos lang ang iyang mga ginikanan kay usa man lang kini ka trabahante sa gobiyerno. Lima ang iyang mga igsuon nga puro babaye ug maoy katabang sa iyang inahan sa paglabada.

Usa ka adlaw, nakabisita ang iyang iyaan sa ilang balay nga tua magpuyo sa dakbayan sa Sugbo. Balo kining iyang iyaan ug usa ka negosyante didto sa Carbon Market.

“Ang maayo pa kanimo, Helen, didto na lang ikaw sa ako motrabaho,” pulong sa  iyang iyaan. “Unya pagka gabii, motungha ka sa kolehiyo. Duol ra sa eskuwelahan ang akong balay busa dili problema ang pagtungha sa kolehiyo. Pero, ang akong ihangyo kanimo nga kinahanglan gayod nga dili ka makig-uyab-uyab aron dili masayang ang atong gasto sa imong pagtuon. Kun dili ka makapugong, na, maayo pa’g dili  ka na lang motungha ug magtanom ka na lang og kamote.”

“Sige! Tumanon ko ang tanan mong pahimangno,” pasiandayon niya sa iyang iyaan. “Unsa may akong trabaho didto, Tiya?”

“Asikasuhon mo lang ang atong negosyo didto sa Carbon ug pagka gabii, motungha ka sa gabii.”

Apan, napakyas si Helen sa mga gipahimangno sa iyang iyaan. Usa na lang ka tuig, makatapos na siya sa iyang pagtuon, miabot sa iyang kinabuhi si Leo. Nahigugma siya kang Leo nga tungod sa iyang gugma niini, daw dili buot nga mawala si Leo bisan usa na lang ka gutlo kaniya. Bation siya’g pangabubho kun dili niya makita si Leo. Sa laktod nga pagkasulti nabuang siya kang Leo. Ang labing sakit sa tanan, mora’g nalimtan niya ang iyang pagtuon. Hangtod nga usa ka adlaw niana, nakahukom siya nga moundang sa pag-eskuwela ug mikuyog siya kang Leo dihang giagni siya niini nga manglakaw sila paingon sa Manila.

Wala’y nahimo ang iyaan ni Helen dihang gibasa niya ang mubong sulat sa pag-umangkon nga nagsulti bahin sa paglakaw niini.

“Pagka anugon sa kahigayonan nga gihatag niya kang Helen,” buwisit nga bata. “Biktima lang si Helen sa usa ka gugmang giahak.”

Hinuon, nag-ampo siya nga magmalampuson si Helen uban kang Leo. (Kataposan)