Ang kamapaubsanon - Gula 4

Samtang nagkaduol na ang oras sa pagpanggawas sa mga kawani sa opisina nila ni Mamer, naghuna-huna ang ulitawo kun unsay isulti niya kang Sherlyn kay alang kaniya nakasala gayud siya kay tungod sa pakig-uban niya sa dalaga naungkag ang maayo nila’ng relasyon ug sa iyang boyfriend.

Gusto ni Mamer nga dili si Sherlyn ang maghuwat kaniya mao nga nagdali siya nga migawas sa opisina ug misakay dayon og taksi paingon sa SM. Tuod, wala pa si Sherlyn sa iyang pag-abot sa kan-anan nga ilang gikasabotan nga adto sila  magkita.

Dinhi niini’ng mao nga kan-anan una sila nga nagkauban ug ni Sherlyn nga nakit-an ang dalaga sa suod nga higala sa iyang pamanhonon. Gitug-an si Sherlyn sa intrigera nga amiga  sa iyang boyfriend nga may kauban kini sulod sa kan-anan mao nga nasuko na sa dalaga ang iyang pamanhonon.

Taud-taod, nalantawan na ni Mamer si Sherlyn nga misulod sa kan-anan. Mipahiyom ang dalaga nga nakakita ni Mamer nga nag-inusara nga naglingkod sa usa ka gamay’ng lamesa. Mitindog si Mamer ug gisugat niya’g lamano si Sherlyn.

“Nice meeting you again Sherlyn,” matud ni Mamer. “Oki lang Mer,” dali nga tubag sa dalaga sa wala pa kini molingkod atubangan sa iyang gilingkoran. Miduol dayon ang waiter ug tagsa-tagsa sila nga gitunolan og menu aron makapili sila sa ilang order.

Human maka-order og pagkaon, nagsultihanay sila si Sherlyn ug Mamer. “Wala na ba gayud mokontak pa nimo ang imong future husband Sherlyn?” ni Mamer pa. Igo lang milingo-lingo si Sherlyn nga mitutok ni Mamer.

“Dili nato siya hisgotan Mer kay bisan pa og mokontak siya nako ug mangayo’g pasaylo sa iyang nahimo, dili na ko niya. Aw nag-ilis na man ‘sab ko’g numero dili na to siya makasayon-sayon og kontak nako,” matud ni Sherlyn.

“Anugon kaayo nga ako maoy nakaamong nga dili madayon ang inyong giplano nga kaminyoon Sherlyn. Kun mahimo pa lang, ako ang motubos sa iyang dapit,” sagol-komedya ni Mamer. Iyang gitutokan ang dalaga.

Para kang Mamer hitsuraan g’yud si Sherlyn ug tingali moabot ang higayon nga abuton og pagmahay ang iyang pamanhonon nga wala mobutang sa lugar sa iyang pagpangabugho sa iyang girlfriend.

“Ayaw lang kaayo kaguol Sherlyn kay ingon ana gayud ang kinabuhi. Pareho gud nako, maayo na namo nga sabot ug sa akong sweetheart nga dili gayud kami magbuwag, apan natintal pa g’yud siya og laing lalaki nga barkada pa g’yud nako kaniadto,” giingnan ni Mamer si Sherlyn. Nakapahiyom si Sherlyn. “Sa ato pa, nasakitan ka na ‘sab diay Mer?” matud ni Sherlyn. – (Sumpayan)