Isla Paraiso - Gula 130

Karon, ang kangitngit sa sulod sa bodega nahisama na lamang sa sihag nga bungbong sa naanad na niyang mga mata. May maaninag na siyang bulto sa anino sa nagkadaiyang butang sulod sa bodega.

Milihok si Rey. Nakahukom siya sa pagbalhin og tagoanan. Maabtikon siya nga mitabok ngadto sa laing dakong haligi nga may igong gilay-on gikan sa haligi nga iyang gipasalipdan.

Misandig siya’g maayo sa haligi. Napaak niya ang iyang wait samtang padayong nagpaniid sa mga kasikas sa palibot.

Unya, takulahaw lang nabatyagan ni Rey nga ingon sa gigitik ang iyang tangkugo. Nanglimbawot ang iyang balhibo. Sa iyang pamatyag, ingon sa may mga mata na nga nagtan-aw kaniya.

Nangandam si Rey sa iyang kaugalingon sa dihang mikusog ang butokbutok sa iyang dughan. Misamot ang kahugot sa iyang paggunit sa iyang Uzi.

Unya dihay tuhaw nga mibadhas sa iyang hunahuna. Usa ka ideya nga alang kaniya, maoy angay buhaton niadtong higayona.

Dihadiha gihinay niya pagkuha ang plaslayit nga gisuksok sa luyong bahin sa karsones nga iyang gisul-ob. -- Sumpayan pa