Ang kamapaubsanon

Nakabantay si Mamer nga mora’g kalit lang mikisdom ang panagway ni Sherlyn human makabasa sa text message nga iyang nadawat. “Duna ba’y problema Sherlyn?” gisukna ni Mamer ang dalaga. Nakasabot si Mamer nga ingon sa wala na mahimutang ang iyang amiga.

“Daan pa lagi ko nga kadtong babaye nga amiga sa akong pamanhonon motug-an g’yud nga may gikakuyog ko nga lalaki ug gilain niya sa pagsabot. Ang akong pamanhonon ang mi-text nako,” may kaluya ang sinultihan ni Sherlyn.

“Mao ba? Apan siyaro na ‘sab, igo ra man ta nga nagkuyog pagpangaon ug wala’y relasyon,” matud ni Mamer. Wala na motingog si Sherlyn nga nagsigi og pindot sa iyang selpon. Misuway pa kini pagkontak pag-usab sa iyang boyfriend apan wala gayud tubaga.

Nangayo’g pasaylo si Mamer ngadto ni Sherlyn nga nakahatag siya og problema sa ilang relasyon ug sa iyang boyfriend. “Grabe ra ‘sab kaayo siya uy, motoo man lang dayon og estorya sa iyang amiga,” matud ni Sherlyn nga mora’g kahilakon.

“Bitaw ‘sab Sherlyn. Dili maayo kun ang asawa o bana subra kaayo ka seloso kay mao kini ang sagad hinungdan sa panag-away sa magtiayon,” matud ni Mamer. Gipangayoan ni Mamer og contact numbers ang dalaga.

 Gihatagan ‘sab ni Mamer ang dalaga sa iyang contact numbers. Human nila’g pangaon, nagbuwag-buwag ang bag-ong managhigala. “Ayaw kabalaka Sherlyn, makasabot ra ang imong pamanhonon nga wala ka’y gihimo’ng dautan,” ni Mamer pa.

Milabay ang mga adlaw. Didto sa opisina ni Mamer, nakadawat siya’g text message  gikan ni Sherlyn apan lahi na nga numero ang gigamit. Nagpahibalo kini nga hangtod nianang buntaga, wala pa gayud mahilot ang kasuko sa iyang pamanhonon kaniya. Makadaghan na mipadala og text message si Sherlyn sa iyang pamanhonon nga nangayo siya og pasaylo kun giisip man niini nga sala ang pakig-uban niya kang Mamer nga nakatabang nga mapadali ang pagkuha niya sa birth certificate didto sa NSO.

Mitawag si Sherlyn kang Mamer. “Nakahukom na lang ‘sab ko Mer nga dili na lang nako siya pugson. Dili na ko modayon pakigminyo niya. Mabarato ko kun ipamugos ang akong kaugalingon kaniya,” matud ni Sherlyn.

 â€œDaku g’yud ko og nahimong sala nimo Sherlyn,” ni Mamer pa. “No, wala ka’y sala nako Mer. Ang akong boyfriend maoy nasayop. Maayo hinoon nga nasayod ko sa iyang batasan mentras nga sayo pa ug wala pa kami makasal,” ni Sherlyn.

Nagkasabot sila nga magkita inigkahapon kun human na si Mamer sa iyang trabaho. Adto sila magkita sa kan-anan sa SM diin didto sila nangaon si Sherlyn ug Mamer sa miaging semana.  (Sumpayan)