Mora’g mabuang

Dear Tita Salie,

Maayong adlaw kanimo. Hinaot nga malipayon ka kanunay sa imong kinabuhi.

Tagoa lang ko sa name nga Judi, single, ug usa ka gay.

Duna man gud koy crush, Tita Salie, ug dili lang crush tungod kay love na kaayo nako kining lalakiha.

Dili man ko makasabot sa akong kaugalingon kay mora man ko og mabuang kun dili ko makakita niya.

Silingan ra baya mi diri sa Mandaue City. Unsa may akong buhaton, Tita Salie? Palihug pasabta ko. Thank you very much and more power.

* * *

Good day,

Natural lamang kanato ang maibog sa atong isig-katawo. Matud pa nila mangita man gani ang usa ka snail o kinhason sa iyang kauban nga iyang naibgan bisan kun wala siya’y lubot kita pa kahang tawo nga dunay dughan ug balatian.

Kinahanglan lang gyud nimo nga imong kontrolahon ang imong pagbati. Ug ayaw tugoti nga mao kini ang mo-control kanimo. You need to educate your feelings aron dili kini magpatuyang.

If you want, magpaduol ka sa maong guy. Imo siyang amigohon sa paagi nga ganahan siya. Ayaw una ipakita nga duna kay gusto niya kun dili isip managsilingan mong duha. Imo siyang tagdon ug estoryahan kun magkita mo diha sa gawas sa inyong panimalay. Kun kaya nimo siyang pangayoan og number buhata kini, o kaha imo siya i-invite sa facebook aron gyud magkasuod mong duha. -- Tita Salie