Kaanyag ni Danessa - Gula 7

Ang pinalit nga pagkaon ni Efren maoy gikaon ni Danessa kay wala kini ganahi sa gi-supply sa ospital. “Ubanan na lang tika dinhi sa ospital Ness kay dili ko makatugot nga biyaan ka nga wala’y kauban. Wala ka ba diay kabanay dinhi?” iyang gisukna si Danessa. Gitug-anan siya sa dalaga nga tua sa Leyte ang iyang kabanayan.

Misamot ang kaikag ni Efren nga ubanan niya sa ospital ang iyang amiga. “Basin og kasuk-an ka sa imong gitrabahoan Efren ha,” pasidaan ni Danessa sa iyang mapinanggaon nga amigo. Wala g’yud masayop si Efren kay nakadawat siya’g text message gikan ni Baste nga nagpahibalo nga nasuko ang ilang supervisor sa iyang pagpalta. Nakabantay si Danessa nga nasubo ang panagway ni Efren nga nagbasa sa text message. Nagpakisayod si Danessa ug iyang gitug-anan sa rason sa kalit niya nga pagsubo. Apan marka bahala si Efren basta kay ubanan g’yud niya si Danessa sa ospital. Nakapahiyom si Danessa nga gatan-aw ni Efren.

“Kanindot kaha kun ingon pa kanimo og kinaiya kadto si Kashimiro nga akong boyfriend. Kaniadto na-ospital ko wala g’yud siya mobantay nako. Mas maayo ka pa Efren kay nalooy ka nako,” matud ni Danessa. “Nangandoy ‘sab ko Danessa nga ang babaye nga ikauban nako sa kinabuhi susama kanimo og batasan ug kaanyag,” gisakyan dayon ni Efren ang higayon. Nagtinutokay sila’ng duha ug daw nagsultihanay ang masi’g nila ka mga mata. Wala tuyoa nga gikawhat ni Danessa ang bukton ni Efren ug anam-anam niya kini nga gibitad aron mapaduol sa katre nga iyang gihigdaan.

Daw miparayeg si Danessa kang Efren. “Sukad sa among panagbuwag ug ni Kashimiro, karon pa nga ang akong kasing-kasing mipitik pagbalik sa gitawag og gugma. I Love You Efren,” matud ni Danessa nga mao na hinoon ang mipadayag sa iyang pagbati kang Efren. “Mahal ko usab ikaw Ness. Mao man bitaw nga bahala na og taktakon ko sa akong trabaho basta dili ko ikaw biyaan dinhi sa ospital,” ni Efren pa.

Wala kapugngi ni Efren nga gikakus niya si Danessa samtang naghigda kini sa katre sa ospital. “Ayaw Fren, kay basin og mokalit pagsulod ang doktor,” matud ni Danessa.

Nahimong kalit ang panagtagbo sa duha ka dalan sa kasing-kasing nila ni Efren ug Danessa. Wala na motrabaho pa si Efrensa iyang kompaniya kay gisaaran siya ni Danessa nga adto na motrabaho sa gidumala niya nga kompaniya. “Kun makagawas na ko sa ospital Mer, lauman nako nga imo akong lipayon,” ni Danessa pa.

Dihang nakagawas na si Danessa sa ospital, giubanan kini ni Efren didto sa ilang balay. “Uncle, pasudlon ka kuno ni Mama sa kwarto unya ako paubanon ni Mama kang yaya nga mamalit og makaon,” matud ni Nissan. – (Kataposan)