Nahadlok maalkanse

Giuli ni Mira ang napalit niyang tangke sa LPG sa iyang gipalitan. Iyang pailisan. Kay sa pagtaud niya og regulator nihungaw ug kusog kaayo ang pagsirit. Nanimahong gas ang tibuok palibot sa iyang kusina. Puwerteng kuyawa niya. Gidali niya’g tangtang ang regulator.

Nahapugwat si Romy, iyang kapikas nga nagtan-aw og telebisyon sa ilang sala  ning buntaga.

Nagpadrayeb siya ni Romy ngadto sa tindahan og LPG nga usa ka kilometro gikan sa ilang gipuy-an sa baryo Tilagan. Si Romy ang nidiskarga sa tangke ug nibutang sulod sa tindahan. Pagkahuman, nibalik siya sa sakyanan nga  nagparking atubangan sa tindahan daplin sa karsada. Magsigi man lang siya’g basa og libro sa sakyanan. Si Mira lang ang niatubang sa tindero.

“Oy! Wa man diay ni gasket ang nosol sa tangke, maam!” matud sa batan-ong lalaki nga nipikat sa selyo sa tangke.

“Unya, unsa may imong nahunahunaan?” ni Mira.

“Tauran lang nako og gasket” sa batan-on.

“Naa diay kay stock sa gasket?” ni Mira.

“Maglugit lang ko’g gasket sa laing tangke. Akong ibalhin diha” sa batan-on.

Naisang kilay ni Mira. Apan wa siya nisupak. Bisa’g kasupakon siya. Kay gusto unta siyang ilisan na lang gyud ang tangke. Ang iyang tuyo nga makapangluto lang siya ginamit ang gas stove. Ang iyang hiniwang karne ug lamas para paniudto, wa nadayon og luto.

Nikuha og bag-ong tangke ang batan-on. Nikuha’g gamay nga kutsilyo. Giablihan ang selyo sa tangke. Giligwatan sa kutsilyo ang gasket sa nosol. Gahi ligwatan ang gasket. Kay maayong pagkahuot sa nosol. Nabalakang nagtan-aw si Mira.

“Dili gyud maayo imong gibuhat, Dong” ni Mira.

“Ngano man maam?’ sa batan-on.

“Dilikado ma damage ang gasket inig tangtang nimo. Unya inig taud nimo sa akong tangke, dilikado’g mohungaw lang gihapon. Kay damage na gud” ni Mira.

“Sige. Ilisan ko na lang nang imong tangke,” sa batan-on. Nakaamgo sa risgo. “Ang ako lang, alkanse na mi’g gamay. Kay nakahungaw na man ning imong tangkeng giuli. Kining akong giilis nimo, wa pa may iban,” sa batan-on.

“Wa kay alkanse. Dong. Kay i-uli ra man sab ni ninyo sa dealer. Ilisan man sab ni nila. Kay di man gyud ni ninyo ikabaligya,” ni Mira.

“Ah husto, ma’am” nakayangoyango ang batan-on.

“Salamat, Dong,” ni Mira. Nigawas aron sa pagpaalsa ni Romy sa tangke sa LPG nga bag-ong inilis. (Katapusan)