Kaanyag ni Danessa

Gula 2

Gihikyad ni Efren ang iyang mga dala ibabaw sa gamay’ng lamesa nga hinimo sa kawayan. Dayon iyang gihukas ang gisul-ob niya nga pantalon ug T-shirt. Nagsul-ob na daan og short pants si Efren ug gisapaw ra niya kini sa karsones.

Mingaw g’yud tuod nga maligo sa dagat nga mag-inusara apan nahuna-huna man gud ni Efren nga gisaaran na niya ang iyang kaugalingon nga maligo sa dagat kay wala man siya’y trabaho. Kini ang rason nga bisan wala ang iyang amigo midayon g’yud siya pag-adto sa dagat. Milukso si Efren gikan sa pangpang paingon ngadto sa dagat. Gilingaw niya ang kaugalingon sa pagsawom-sawom unya mipadaplin siya ipon sa ubang mga nangaligo niadtong higayona. Nakahuna-huna si Efren sa pagpasilong ilawom sa nasungib nga pangpang.

Gilantaw ni Efren ang ubang nangaligo. Enjoy kaayo sila kay kuyog man nila ang ilang mga higala. “Pwede ko moanha diha? Mabaw ra diha?” nahaigking si Efren pagkadungog sa tingog sa bata’ng babaye nga namidpid sa bato.

“Mabaw ra man. Gusto ka moari day?” bawos pangutana ni Efren sa bata. Anam-anam nga mipaduol ang bata kang Efren. Estoryador kaayo ang maong bata mao nga nalingaw na lang ‘sab si Efren.

“Ayaw’g saba, gikomedyahan nako si Mama aron pangitaon ko niya,” matud sa bata nga nagpahiyom kang Efren. Nasabot ni Efren nga komedyante diay kining maong bata. “Basin og masuko unya ang imong Papa,” giingnan ni Efren ang bata.

Apan abtik nga mitubag ang bata nga wala siya’y papa. “Ikaw uncle kinsay imong kauban pag-anhi sa beach,” matud sa bata nga tabian. “Wala ko’y kauban, ako ra,” giingnan ni Efren ang bata.

“Kami kay tulo. Si Mama ug ang akong yaya nga si Ate Grace,” matud sa bata. Gipangutana ni Efren ang bata kun unsa’y iyang ngalan. “Akong ngalan? Nissan,” dali nga tubag sa bata.

Nahakatawa si Efren kay ang ngalan sa bata mora’g modelo sa awto. Gitutokan ni Efren ang panagway sa bata ug may kaamgid-amgid tuod kini sa usa ka Hapon. Taud-taud, dunay babaye nga nabantayan ni Efren nga daw adunay gipangita.

“Si Mama,” gitudlo ni Nissan ang babaye sa unahan. Dili makatoo si Efren kay mora’g dalaga man ang babaye nga gitudlo ni Nissan nga iyang mama. “Ma! Ma! dia ra ko!” gisinggitan ni Nissan ang iyang mama.

“Sus, nganong naa ka man tawon diha?” matud sa babaye nga mipaduol. “Amigo nako Ma, kinsa gani to imong ngalan?” matud sa bata nga si Nissan. Nahakatawa na lang si Efren kay giangkon siya nga amigo apan wala diay makaila kaniya. – (Sumpayan)